Ә.Тәжібаев атындағы облыстық әмбебап-ғылыми кітапханасында ақындық өнерде өзіндік қолтаңбасы бар, бірнеше жыр жинақтарының авторы, ақын Елубай Әуезовтің «Менің жырым – жан хәлімнің тәпсірі» атты шығармашылық кеші өтті.
Адамзат жаратылысы астарынан ақиқат іздеп, екі дүние арасындағы жұмбақ әлемнің сан қырлы құпиясын жырларына арқау еткен ақынның шығармалары шынайылығымен бағалы. Ойлы да астарлы өлеңдері оқырманды еріксіз баурап алады.
Ақынның кешін ҚР Мәдениет қайраткері Айдос Рахметов жүргізді. Кеш барысында Қазақстан Жазушылар одағының мүшесі, ақын Толыбай Абылаев, жазушы-сатирик Қазыбек Әшірбек сөз алып, ақын шығармашылығының басты тақырыбы – қарапайым өмір өрнектері екенін, сондықтан қалың оқырман жүрегіне қапысыз жол табатынын айтты.
–Табиғат берген талант пен тынымсыз ізденістің, шығармашылық шабыттың көрінісі – бірнеше жыр жинақтарының өзіндік салмағы бар, – дейді Т.Абылаев. Сол сияқты, ақын Оңталап Базаралиев, жыршы Берік Саймағанбетов ақын Е.Әуезовтің азаматтық ұстанымына қатысты жүрекжарды пікірлерін білдіріп, алдағы уақытта тың толғаныстар мен жаңа туындылар күтетінін жеткізді. Арасында ақынға оқырмандар тарапынан сауалдар қойылып, өзара пікір алмасты.
Әлеуметтік желі арқылы ақын жырларымен жақсы таныс, тұрақты оқырмандарының бірі, зейнеткер ұстаз Қанзада Алтаева кеш иесінің шығармашылығына тілектестігін білдіріп, оның жаңа туындыларын шабыттана оқыды. Сондай-ақ, жас оқырмандар жырға кезек берді.
Өмір жолы, шығармашылығы, шабытты шақтары туралы қызықты әңгімелеп берген ақын, сиясы кеппеген жаңа жырларын оқып, оқырмандардың риясыз ықыласына кенелді. Қаумалаған оқырманның ыстық ықыласынан шабыт алған ақын жыр тиегін ағытып, тылсым өнер тұрғысындағы еркін ойларын ортаға салып:
Ашылса деп маған тылсым Хақ сыры,
Ұмтыламын көп жырлауға жақсыны.
Сізді бейжай қалдырмауы өлеңнің,
Менің жырым – жан хәлімнің тәпсірі – деп қорытындылады.
Әдеби кешті қорытындылаған кітапхана директоры Нұрлыбек Мыңжас ел руханиятының дамуы жолында еңбек етіп жүрген өнер, шығармашылық өкілдерінің жұмыстарын жас ұрпаққа насихаттау бағытында жүйелі жоспар жасалғанын айтып өтті. Сөз соңында ақынға шығармашылық табыстар тіледі.
>>> Біздің Facebook, Instagram парақшаларымыз бен Telegram каналымызға жазылыңыз! <<<
