Өңірде инновациялық жобаларды дамыту бағытында жүйелі жұмыс жүргізіліп келеді. Осы үдерістің негізгі қозғаушы күштерінің бірі – Kyzylorda Hub бизнес-инкубаторы. Ол өңір жастарын, кәсіпкерлерді және мемлекеттік секторды заманауи технологияларға, әсіресе жасанды интеллектке бейімдеуді басты мақсат етіп отыр. Kyzylorda Hub-тың бүгінгі жетістігі мен биылғы жоспары туралы орталық жетекшісі Жанарыс Түбекбаевпен әңгімелескен едік.
– Алдымен Kyzylorda Hub-тың атқаратын қызметіне тоқталсақ… Өңір үшін бұл орталықтың маңызы қандай?
– Kyzylorda Hub – бұл тек іс-шаралар өткізетін алаң ғана емес, өңірдегі толыққанды инновациялық экожүйені қалыптастыруға бағытталған орталық. Біздің басты мақсатымыз – облыста технологиялық кәсіпкерлікті дамыту, жастарды IT саласына тарту және цифрлық шешімдерді нақты секторға енгізу.
Хаб өз жұмысын бастаған уақыттан бері көп нәтижеге қол жеткізді. Бүгінгі күнге дейін 389 іс-шара өткізіліп, 13994 қатысушы қамтылды. Бұл өңір тұрғындарының инновацияға деген қызығушылығының артқанын көрсетеді. Соның ішінде жасанды интеллект бағыты бойынша 93 іс-шара ұйымдастырылып, 1752 адам қатысқанын ерекше атап өткім келеді. Хаб аясында жүзеге асқан жобаларға тартылған инвестиция көлемі 42,2 млн теңге.
– Осы жыл Kyzylorda Hub үшін қандай басымдықтармен ерекшеленбек?
– Басты стратегиялық бағыт – жасанды интеллект. Бүгінде ЖИ барлық саланың даму драйверіне айналып келеді. Сондықтан біз өңірде «AI-Movement» концепциясын іске асыруды жоспарлап отырмыз.
Осы бастама аясында мемлекеттік мекемелерге, әлеуметтік қызмет көрсету орталықтарына және кәсіпкерлерге арналған арнайы AI Bootcamp бағдарламалары ұйымдастырылады. Бұл – 4 күндік интенсивті оқыту форматы. Қатысушылар генеративті жасанды интеллекттің негізгі құралдарын меңгеріп, оны өз күнделікті жұмысында тиімді қолдануды үйренеді. Нәтижесінде қызметтік процестерді автоматтандыруға, уақыт пен ресурсты үнемдеуге мүмкіндік туады.
– Өңірлік стартаптарды қолдау бағытында қандай нақты бағдарламалар жүзеге асырылады?
– Биыл стартаптарды қолдауға арналған екі ірі бағдарламаға басымдық беріліп отыр. Біріншісі – Startup Joly преинкубация бағдарламасы. Бұл бағдарлама технологиялық кәсіпкерлікке алғашқы қадам жасағысы келетін, 16 жастан асқан кез келген азаматқа арналған. Бағдарлама идея сатысындағы жобаларды MVP, яғни минималды өміршең өнім деңгейіне дейін жеткізуге бағытталған.
Екіншісі – Startup Orda инкубация бағдарламасы. Бұл – MVP сатысындағы жобаларды нарықтағы алғашқы сатылымға дейін жеткізетін 2 айлық бағдарлама. Қатысушылар 10 апта бойы семинарлардан өтіп, тәжірибелі трекерлерден тегін консультация алады. Үздік деп танылған жобалар республикалық венчурлық қорлар алдында таныстырылып, инвестиция тарту мүмкіндігіне ие болады. Айта кету керек, бұл бағдарлама Astana Hub халықаралық технопаркінің жетекшілігімен еліміздің барлық өңірлерінде өтеді.
– Инновациялық сайыстар, яғни хакатондар өңір үшін қандай мүмкіндік береді?
– Хакатон – нақты мәселелерге жедел әрі тиімді IT шешім табудың ең ұтымды форматы. Биыл Kyzylorda Hub аясында 4 хакатон өткізу жоспарланып отыр. Әрқайсысының тақырыбы мен нақты тапсырмалары болады.
Бұл шаралар арқылы өңірдің үздік технологиялық шешімдері әзірленіп, жергілікті мекемелер мен кәсіпорындарға жасанды интеллект құралдарын енгізуге мүмкіндік туады. Кәсіпорындар өздеріне қажетті IT шешімдерді Kyzylorda Hub арқылы тапсырыс беріп, хакатон нәтижесінде дайын өнім алуға қол жеткізе алады.
– Жаңа «HUB TASKS» платформасының ерекшелігі неде?
– «HUB TASKS» – өңірлік IT компаниялар мен фрилансерлерге арналған арнайы платформа. Бұл платформа Қызылорда облысындағы тапсырыс берушілердің технологиялық тапсырмаларын орындауға бағытталған.
IT шешімге мұқтаж кәсіпорындар мен мекемелер өз қажеттілігін сауалнама арқылы жолдайды. Ал өңірдегі ең үздік әзірлеушілер сол тапсырмаларға өз ұсыныстарын береді. Осылайша келісім-шарт жасау мәдениеті қалыптасып, жергілікті IT нарықтың дамуына серпін беріледі.
– IT білім беру бағытында қандай жұмыстар атқарылуда?
– IT саласына қызығушылық танытқан жастар үшін Tech Orda бағдарламасы өз жалғасын табады. Бағдарлама аясында облыстың кез келген жас тұрғыны еліміздегі аккредиттелген жеке IT мектептерінде грант негізінде білім ала алады. Қызылордалықтар өңірлік мектептермен қатар, Астана және Алматы қалаларындағы IT мектептерде онлайн форматта оқуға мүмкіндік алады.
Сонымен қатар, қазіргі таңда IT білім берудің үздік үлгілері саналатын Tomorrow School және TUMO School мектептерін ашу бойынша облыс әкімдігі мен Қорқыт ата атындағы Қызылорда университетінің қолдауымен жұмыстар жүргізілуде. Бұдан бөлек, хабта тұрақты түрде воркшоптар, буткемптер мен кездесулер ұйымдастырылады. Ал LUPIC халықаралық бағдарламасы аясындағы 3 айлық 4 білім беру бағдарламасы қыркүйек айынан бастап іске қосылады.
– Стартаптар мен IT компанияларына қандай қолдау көрсетіледі?
– Өңірдегі IT стартаптар мен компаниялар Astana Hub қатысушысы атанып, салықтық преференцияларға ие бола алады. Ең бастысы Kyzylorda Hub аясында көрсетілетін барлық қызметтер стартаптар үшін тегін. Бұл – жас кәсіпкерлер үшін үлкен мүмкіндік.
– Сыр жастарына айтар ойыңыз?
– Инновация мен технология – өңірдің болашағы. Біз барша жастарды, кәсіпкерлерді және жаңа идеясы бар азаматтарды Kyzylorda Hub алаңына белсенді қатысуға шақырамыз. Барлық анонстар мен жаңалықтар @kyzylordahub әлеуметтік желідегі парақшамызда тұрақты жарияланады.
Сұхбаттасқан
Айсәуле ҚАРАПАЕВА,
«Сыр бойы»
