Айдынды Аралдың айбынды перзенті, арқалы ақын, драматург Жарасқан Әбдірашевтің өлеңдері теңіздің көкке шапшыған толқынындай адуын, өрлікке толы. Аудандағы іргелі білім ордасының бірі №62 мектеп-лицей Жарасқан Әбдірашевтің атымен аталады. Мұнда ақын жырларын жатқа оқитын жырқұмар жандардың қарасы қалың. Өлеңге құмар үлкен-кішіні көріп, поэзия деп аталатын құдіреттің қадір-қасиетін мойындайсың.
Ақын есімін иеленген №62 мектеп-лицейдің тарихына қысқаша тоқтала кетсек. 1986 жылы ашылған мектепте алғашқыда 1007 оқушы болды. Білім ордасының білікті басшылары мен педагог қызметкерлерінің қажырлы еңбегі, үйлесімді қызметінің арқасында осынау іргелі ұжым талай асуларды алды. Биік белестерді бағындырды. Төгілген тер, жалықпай іздену ізсіз кетпеді. 2016 жылы аудандағы инновациялық мектеп-лицей дәрежесіне көтерілді. 2017 жылғы қаңтарда Жарасқан Әбдірашевтің аты берілді.
Мұнда 1-11 сыныптар аралығында 1234 оқушы білім алуда. Мектепке дейінгі тәрбиеге баулитын 4 МАД тобында 90 оқушы, мектеп жанынан құрылған шағын орталықта 75 бүлдіршін тәрбиеленіп келеді. Шығармашыл ұстаздардың арқасында жылда «Алтын белгі» және «Үздік аттестат» иегері шығып отыр. Ұжымда педагог-зерттеуші, педагог-сарапшы, педагог-модератор, І санатты, ІІ санатты мұғалімдер және 1 магистр білім беруде.
Іргелі білім ұясы жаратылыстану бағытында білім беретін тірек мектеп болып саналады. Соңғы үш жылда 13 «Алтын белгі» иегері шыққан. Өткен жылы Ұлттық бірыңғай тестілеуде аудан бойынша ең жоғары балды мектеп-лицей түлегі Қайырла Ранай иеленді. Аудандық, облыстық және республикалық пәндік олимпиадалар, ғылыми жұмыстар сайысында да оқушылар жүлделі орындарға ие болуда. 2017 жылдан бері мектеп-лицей директоры қызметін Жасұлан Айтжанов атқарып келеді.
Мектепте ҚР Білім және ғылым министрлігінің Білім беру ісінің құрметті қызметкері атағын, министрліктің Құрмет грамотасын, Алғыс хатын, «Дарын» республикалық ғылыми-практикалық орталығының марапаттарын, республикалық «Үздік педагог», Халықаралық Қазақстан таланттары шығармашылық орталығының «Мәдениет майталманы», өзге де төсбелгілер иеленіп, Арал ауданы әкімінің пәндік олимпиадасында жеңімпаз атанған ұстаздар жұмыс істейді.
Мектеп-лицейде тәрбиелік іс-шаралар мен сынып сағаттары, ата-аналар жиналысы, мұғалім шығармашылығын дамытатын вебинар, семинар-тренингтер «ZOOM» платформасымен өткізілуде. Мектеп оқушылары аудандық оқушылар үйі, балалар өнер мектебі мен спорт мектебіндегі түрлі үйірмелерге қатысады. Қашықтан оқу кезінде А.Құнанбайұлының 175 жылдығына орай «Ұлттың ұлы мұрасы» атты республикалық байқауда және «Ұлы дала ұрпағымыз» атты республикалық байқауда Санжар Улияев «Эстрадалық вокал» номинациясы бойынша бас жүлдені иеленді. Сондай-ақ мектеп оқушыларының ой-өрісін дамыту, спорттық шеберліктері мен зияткерлік қабілеттерін арттыру, спортпен шұғылдануға үндеу мақсатында шахматтан өткен облыстық жарыста мектеп-лицейдің 9-сынып оқушысы Сабина Кішібай ІІ орынды иеленді. Ал бокстан 2005-2006 жылы туған жасөспірімдер арасында Ақтөбе қаласында өткен Қазақстан Республикасының чемпионатында 46 келі салмақ дәрежесінде 9-сынып оқушысы Данияр Кеңесханов ІІІ орынды иеленіп, теңіз төскейінің мерейін асырды.
– Мемлекет басшысы Қасым-Жомарт Тоқаев «Жаңа жағдайдағы Қазақстан: Іс-қимыл кезеңі» атты халыққа арнаған Жолдауында білім саласын дамытуға байланысты маңызды міндеттер жүктеді. Бүкіл әлемді жайлаған пандемия білім беру саласына да айтарлықтай әсер етті. Білім жүйесінде жаппай қашықтан оқыту форматы енгізіліп, бұл педагогтармен қатар оқушыларға үлкен жауапкершілік артты. Соған қарамастан, мұғалімдердің жаңалықты жатсынбай қабылдауының арқасында өткен оқу жылы сәтті аяқталды. Ең бастысы – қашықтан оқытуды дұрыс жағынан пайдаланып, қиындыққа мойымай, бір жағадан бас, бір жеңнен қол шығарып, бірге әрекет жасасақ, бағындырар биігіміз бен алынбайтын қамалымыз болмайды. Қай кезеңде болсын, жас ұрпаққа білім мен тәрбие беру – қоғам алдындағы ең маңызды, жауапты іс, – дейді Жарасқан Әбдірашев атындағы №62 мектеп-лицей директоры Жасұлан Маханбетұлы.
Жұмабек ТАБЫНБАЕВ,
«Сыр бойы»
Арал ауданы
>>> Біздің Facebook, Instagram парақшаларымыз бен Telegram каналымызға жазылыңыз! <<<
