Зульфия Мырзахметованың есімі облыс көлеміндегі аналар қауымына жақсы таныс. Себебі ол – балалар дәрігері.Өзінің 22 жылдық тәжірибесінде Зульфия Қайырбекқызы талай сәбидің саулығын сақтауға үлес қосып, дертіне дауа тапқан абзал жан.
Ол еңбек жолын облыстық аурухананың клинико-диагностикалық зертханасында дәрігер-лаборант болып бастаған. Онан соң балалар соматикалық бөлімінде педиатр болып еңбек етеді. 1999 жылдан 2002 жылға дейін облыстық медицина орталығында қызмет атқарады да, 2002 жылдан бастап облыстық балалар ауруханасына ауысады. Аурухананың қым-қуыт тірлігінде жүріп Зульфия өзінің білімімен, ізденімпаздығымен, еңбексүйгіштігімен ұжым арасында абыройға бөленеді. Өзінен үлкендерден үйрене жүріп, тәжірибе жинақтайды. Өз ісіне деген адалдығының, біліктілігінің арқасында үш жылдан кейін ол «Экология және балалар» бөлімінің меңгерушісі қызметіне тағайындалады. Ұжым басшылығы мен әріптестері үміт артып тапсырған сол қызметті күні бүгінге дейін үлкен жауапкершілікпен атқарып келеді.
Уақыт талабынан қалмай үнемі білімін жетілдіріп, медицинадағы озық әдіс-тәсілдерді меңгеруді алдына мақсат етіп қойған ол біліктілігін көтеру жолында еліміздің ең үздік клиникаларында түрлі курстардан өткен. Тәжірибелі маман сонымен бірге ғылыммен де айналысты. Соның негізінде ол бүгінде медицина ғылымдарының кандидаты.
Жоғары санатты дәрігер Зульфия Қайырбекқызының еңбегі елеусіз емес. Соның ең бастысы – былтыр жыл аяғында «ҚР Денсаулық сақтау ісінің үздігі» төсбелгісімен марапатталуы. Кеудесінде жарқыраған бұл медаль тәжірибелі, білікті дәрігерді онан әрі шабыттандырып, өз қызметіне деген сүйіспеншілігін арттыра түскені рас. Балалардың бабын білген маманның алар асуы әлі алда деген сенімдеміз.
Айнұр БАТТАЛОВА.
>>> Біздің Facebook, Instagram парақшаларымыз бен Telegram каналымызға жазылыңыз! <<<
