Сыр елінің бет-бейнесі соңғы оншақты жыл ішінде өмірге қайта келгендей, көңілге жаңа енгендей ерекше күй тапты. Елбасы Н.Назарбаевтың: «Тәуелсіздік жылдарындағы жетістіктерді бір ғана Қызылорда облысынан көруге болады», – деген сөзі аймақта атқарылған қыруар жұмыстардың нақты бір дәлеліндей.
Осынау жетістіктерге ең көп үлес қосқан құрылыс саласының майталмандары десек, бұл деректі ешкім де жоққа шығармайды. Құрылысшылар әсіресе Қызылорда қаласының келбетін көркейтіп, керегесін кеңейтті. Біз айтып отырған игіліктердің әрдайым басы-қасынан табылып, өзінің ерен еңбегімен танылған құрылыс компанияларының бірі Ибрагим Әбубәкіров басқаратын «Абу-Сер» ЖШС болатын.
Жамбыл гидромелиоративтік құрылыс институтын бітіріп, еңбек жолын 1989 жылы облыстық су басқармасының қарамағындағы ПМК-33 мекемесінде өндіріс шебері, прораб болып бастаған Ибрагим осы салада тәжірибе жинап, 1998 жылдан жеке кәсіппен айналысты.
2001 жылы құрылған серіктестік айналасымен ықпалды қарым-қатынас орната білген Ибрагимнің ұйымдастырушылық қабілетінің арқасында аз уақытта әлеуетін арттырып, «Дәнекер», «Интегрострой», «Промстрой» секілді ірі құрылыс компанияларының қатарынан табылды. Алғашқы кезде ол «сақалды құрылыстарды» сапқа қосты. Ешкім жауапкершілігіне алғысы келмейтін осы жұмыстардың сынынан өтіп, сенім иеленді.
Қызылорда қаласында жаңадан ашылған «Сырдария» тұрғын ауданындағы 5 қабатты 40 пәтерлі тұрғын үй құрылысын сапалы салып, уақытылы пайдалануға берді. Қала және аудандарда мектептер, ауылдық клубтар, балабақшалар, дәрігерлік-фельдшерлік амбулаториялар, басқа да әлеуметтік нысандар құрылысын жүргізді.
«Абу-Сер» ЖШС тарихындағы елеулі оқиға сметалық құны сол уақытта өте көлемді қаржыны құрайтын «Облыстық мекемелер үйі» ғимаратының құрылысын қолға алуы ерлік іспен тең еді. Көптеген сыни пікірлерге қарамастан, барлық сот процедураларынан ұтып шығып, облысымыздағы ең еңселі, күрделі, әсем ғимаратты серіктестік мерзімінен бұрын пайдалануға тапсырды. Сырдария өзенінің сол жағалауын игеру басталғанда да ең бірінші болып жер ашып, жең түрген осы «Абу-Сер» болатын. Сөйтіп, өз есебінен №18 бесқабатты тұрғын үй құрылысын және 320 орындық «Ханшайым» балабақшасын салып, тапсырды.
Сол жағалаудың құрылысын бастарда бір тосын жағдай орын алды. Дарияның арғы бетінде бұрыннан тұрып келе жатқан он бес шақты жеке үй болатын. Әкімдік оларға қаладан алыс маңнан, Талсуат аумағынан жер учаскесін беріп, құрылыс компанияларына үй салып беруді тапсырды. Солардың бірі берілген жерге бармады, өзі «Арай» шағын ауданынан жер учаскесін тауып, үйді сол жерден салып беруді сұрады. Осы іске ойланбай кіріскен Ибрагим қаланың сырты емес, іші ғой деп әлгі кісінің айтуымен келісті үй салып, оның жылуын, газын қосып, тап-тұйнақтай етіп тапсырды. Енді осымен болды демей, сол үйге қайта айналып соғып, жағдайын сұрап тұрды. Үйдің коммуналдық қызметінен ақау жоқ па, жылы ма деп олардың мәселесіне өзінің кез келген уақытта көңіл бөлетінін білдіргендегі үй иелерінің ризашылығын жеткізе айту қиын.
«Абу-Сер» республикада баламасы жоқ «Жастар орталығы» ғимаратын және №№20, 32, 42 көпқабатты тұрғын үйлерді тұғырынан көтерді.
Серіктестік басшысы көңілді жүргенді ұнататын азамат, спортты жақсы көретін. 2015 жылы «Арай-1» шағын ауданындағы 900 орынды мектеп-лицейді пайдалануға берді. Оның спорт алаңы көк төселген, айналасы қоршалған көзтартарлық әдемі болып шықты. Сол спорт алаңында барлық құрылыс бригадасын жинап, футболдан, волейболдан жарыс ұйымдастырды. Сонан соң жеңгенге де, жеңілгенге де – бәріне ақшалай, заттай сыйлықтар таратты. Ибекең құрылысшылардың сыйақысын осылайша әсерлі қылып беруді ұнататын. Ынталандыру, жұмысшыны бағалау, олардың мұқтаждығына көмек қолын созу секілді мәселелерге ерекше мән беретін. Сонымен бірге ол мұқтаж жандарға көмектесуді өзінің басты парызы санаған жан. 2004 жылы қаланың «Шанхай» ауданында тұратын бір жалғызбасты әйелдің үйінің іргесіне ыза теуіп, құлау қаупіне жеткенін кездейсоқ көріп қалып, жаңа үй салып берді. Алты аласыз, бес бересіз кісінің өзіне осынша жақсылық жасағанына көпке дейін сене алмаған тұрғын кезінде облыстық телеарна арқылы қамқоршысына алғыс та білдіріпті. «Ол кезде компанияның әлеуеті көтеріле қоймаған, біреуге үй салып беретін жағдайда емеспіз. Шынымызды айтсақ, басшымыздың сол кісінің үйін салып жатқанын бірге қызмет жасайтын өзіміз де білген жоқпыз. Ибрагим – жұртқа жақсылық жасау арқылы Жаратушы Иенің ризалығына бөленген жан. Ол ешқашан бергенін айтып, риялыққа бармайтын, не істесе елеусіз ғана жасайтын», – дейді мекеменің бүгінгі қызметкерлері.
«Абу-Сердің» салған нысандарын айта берсек, салақұлаш тізім шығады. Арал және Жалағаш аудандық ауруханаларының да құрылысын жүргізген осы серіктестік болды. Бұл серіктестіктің жоғарыда аталған күрделі құрылыстар салудағы іс-тәжірибелерін ескере отырып, 2018 жылы облыс басшылары елорданың 20 жылдығына Қызылорда облысының тартуы – «Зымыран-ғарыш техникасы музейінің ашық экспозициясы» құрылысын салуды сеніп тапсырды. Серіктестік бұл жолы да сенім үдесінен шығып, әлемде баламасы жоқ ғарыш кемелері үлгісіндегі музейді салып, уақытында бітірді. Бұл музей бүгінде елорда тұрғындарының, қала қонақтарының, шетелдік туристердің сүйікті демалыс орнына айналып отыр.
Жанында болғандардың айтуынша, Ибрагим Астанада (елорданың сол кездегі атауы) ашық экспозиция құрылысын салып жатып та, қаншама мұқтаж жандарға қайырымдылық жасапты. Қызметтестері өздеріне де, басқа да талай адамға дәл өзінің туысындай қылып жәрдемдескенін аузынан тастамайды. Жақсылығын айтпайтын, бергенін сұрамайтын қасиетіне көбірек тоқталады.
«Қазақта «өлер бала өзгеше» дейтін сөз бар. Өмірінің соңғы күндері аңдаған адамға Ибрагимнің бойынан көп нәрселерді байқауға болады екен. Бірақ, ондай ой үш ұйықтасақ түсімізге кіріп пе? Сонда Ибрагимнің жүзінде ауырып жүрген жандай солғындық, жүдеушілік болған жоқ. Оның өн бойында біз аңғара қоймаған бір нұрлы кейіп болды. Алла оның ішкі жан жарығын сыртына шығарып қойғандай сол сәттерге көз тоқтатпаппыз.
Маханбетов ауылының тұрғындары Ибрагимді өз ауылының баласындай жақсы көрді. Сол ауылдағы «Қарақожа» қорымын жөндеп, айналасын қоршаймын деген ойы, мешіт салсам деген ниеті болды. Оларды жасай алмады, өмірі жетпеді. Өзі қайтыс болған соң сол істі баласы, Рүстем ініміз қолға алды. Қорымды қоршап, айналасын тегістеп, жол төседі…», – деп еске алады апасы Роза Серікбайқызы.
Адамдық қасиет иесі айтып өткенімдей, Қызылорданың дамуына үлкен үлес қосты, құрылыс саласында табысты еңбек етті. Аймақта абыройлы мекеменің көшін бастап, қаламыздың жаңаша сипатқа ие болып, архитектуралық келбетінің заманауи түрленуіне айрықша атсалысты. Оның осындай еңбегі Үкімет тарапынан да лайықты бағасын алды. «Қазақстан Конституциясына 20 жыл», «Ерен еңбегі үшін» медальдарын, «Құрылыста сіңірген еңбегі үшін» орденін омырауға тақты.ҚР Ұлттық бизнес рейтингі ұйымдастыру комитетінің номинациясы бойынша «Үздік құрылысшы», «2014 жылдың Басшысы» аталымдарын алды. Қазақстанның құрметті құрылысшысы, Қызылорда қаласының құрметті азаматы атанды.
Ибрагим зайыбы Бақыт екеуі отбасында екі қыз, үш ұл тәрбиелеп, олардан немере сүйді. Ұлдың үлкені Рүстем Ибрагимұлы қазіргі кезде әкесі негізін қалаған «Абу-Сер» серіктестігіне жетекшілік жасап отыр.
Асыл азамат Ибрагим Серікбайұлы Әбубәкіров 2020 жылдың 3 шілдесінде өмірден өтті. Алайда, оның ізгілік шашқан ісі мен ізі кейінгілер үшін айқын жол көрсетіп, ұрпақ үлгісіне айналады деп сенеміз.
Дүйсенбек АЯШҰЛЫ,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
