Сөз арқауы – ардақты азамат, жол саласының ардагері Ботабай Рыстығұлұлы. Оның өмір жолы, ел игілігіне атқарған қызметі, жақсылық пен ізгілікке, адамгершілік пен адалдыққа, әділдік пен тазалыққа толы тұлғалық ұстанымдары – тек өзінің ғана абырой, беделі емес, әсіресе өскелең жас ұрпаққа өнеге.
Әкесі Рыстығұлды Арал, Қазалыдағы ағайын-туыс құрметтеп «Бапа» деп атайтын. Осындай тектіден тәрбие алған жан жағымпаздыққа жаны қас, қарапайым, шыншыл да еңбекқор болып ер жетті. 1965 жылы Ташкент қаласындағы теміржол инженерлерін дайындайтын институтты бітіріп шықты. 1967 жылдан бастап Қазалы локомотив депосында машинист көмекшісі, шебер, диспетчер болып жұмыс істеді. 1971-1977 жылдары Қазалы аудандық партия комитетінің бөлім нұсқаушысы, локомотив депосының партия комитеті хатшысы қызметтерін атқарды.
1986 жылға дейін аудандық атқару комитеті төрағасының орынбасары, Жаңақазалы поселкелік кеңесі атқару комитеті төрағасы, локомотив депосының бастығы, Қазалы қалалық атқару комитетінің төрағасы қызметтерін атқарды. 1986-2001 жылдары аудандық жол жөндеу басқармасының бастығы, «Қазалы жолдары» ЖШС директоры болды.
Айтқан сөзін екі етпей орындайтын, уәдеге берік болмысымен танылған Ботабай Рыстығұлұлымен бірлесіп жұмыс істеуді, қызметтес болуды әріптестері мәртебе санады. Салада еңбек жолын енді бастаған жастарға бағыт-бағдар берді. 2001 жылдан 2010 жылы зейнетке шыққанға дейін «Қазавтожол» РМК облыстық филиалының Қазалы аудандық бөлімінің бастығы болды.
Ағамыз жол құрылысында жүріп, тек Қазалы ауданына ғана емес, аймаққа, жалпы елге еңбегі сіңді. Шәкірт тәрбиелеп, үнемі ағалық ақылын айтып жүретін. Ол кісінің жүріп өткен өнегелі жолы ешқашан ұмытылмайды.
«Жігітке жеті өнер де аз» дейді халқымыз. Ботабай Рыстығұлұлы қолы бос уақытта саятшылықпен айналысты. Домбыра, мандалин аспаптарында ойнайтын, әуелетіп ән де шырқайтын. Отырған жері ойын-сауыққа толы жанның ең керемет қыры әңгімешілдігі еді. Көнекөз қариялардан естігендері, әкесінің басынан өткен оқиғалар, ашаршылық, соғыс жылдары, одан кейінгі қиын-қыстау кезеңдер туралы әңгімелері де ел аузында. Бұрынғының адамдарының ауызбіршілігі, адалдығы, бір-біріне деген қамқорлығын жастарға үлгі етуден жалықпайтын.
– Әкеміздің еңбек жолы, өмір белестері білетін жұрттың көз алдында. Ең бастысы, оның барлық істе өзіне жүктелген міндетті атқаруда абырой биігінен көрінуге құлшынып, дербес жауапкершілігін жоғары сезінуі дер едік. Ол күш-жігерін, санаға сіңірген білімін, өзі қалаған мамандықтың қыр-сырын терең игеруге жұмсады. Жастайынан табандылығымен танылды, өжеттігінен өзгермеді. Қиын сәттерде тапқырлық танытып жүрген жас маманды аудан басшылары да назардан тыс қалдырмады, – деп еске алады әке тұлғасын жол саласында жемісті еңбек етіп жүрген ұлы Нұркен Ботабайұлы.
Ғибратты ғұмыр кешкен аяулы жанның еңбегі елеусіз қалған жоқ. Ботабай Рыстығұлұлы бірнеше рет аудандық, ауылдық, қалалық кеңестерге депутат болып сайланды. 1970 жылы «Еңбек даңқы», 1975 жылы «Үздік еңбегі үшін» медальдарымен, «Қазақ КСР-на 60 жыл» арнайы белгісімен, «Қазақстан Республикасының 10 жылдығы» мерекелік медалімен, 2004 жылы «ҚР Құрметті жолшы» белгісімен марапатталды. 2012 жылы Қазалы ауданының «Құрметті азаматы» атанды.
Жол саласының майталманы салада қандай қызмет атқарса да, ауданның саяси-әлеуметтік, қоғамдық жұмыстарынан шет қалған емес. 1992 жылы Жанқожа Нұрмұхамедұлының кесенесін салу, халық батырына арналған өзге де іс-шаралардың жоғары деңгейде өтуіне халықпен бірге атсалысты. Сыр сүлейі Қарасақал Ерімбет, Мүсірәлі әулие, Әйтеке би секілді тарихи тұлғалар тағылымын насихаттау ісінде үлкен бастамаларды қолға алды.
Мәңгілік өмір жоқ. Әулетіне қорған, үлгілі әке болған Ботабай ағамыз жары Орынкүл анамыз екеуі алты бала тәрбиелеп өсіріп, 17 немере, 2 шөбересін көріп кетті. Бүгінде ұрпақтары ардақты ағаның өзі, көзі десек те болады. Жауапты қызметтерді абыроймен атқаруда. Әке абыройын асқақтатып, қай талапта, қай тарапта жүрсе де, биіктен көрінуде.
Мәңгілік өлмеудің жалғыз жолы халыққа қызмет ету екенін дәлелдеген қайраткер тұлғаның ғибратты ғұмыры ұрпаққа үлгі бола бермек.
Малика ТҰРҒАНТАЙ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
