Көктем мезгілі жақындағаннан адамзат баласы жаңаруға ұмтылып, табиғат түлеуге бет бұрады. Күн мен түннің теңелуі он сегіз мың ғаламға өзгеше серпін сыйлайды. Барлық жанды-жансыз атаулы түбірінен жасанып, тұмса табиғат тағы да бір уыз қалпына келеді. Жер-Ана бусанып, тіршілік атаулы жандана бастайды. Осы кезде адамзат та жаңаша екпін, тың күшпен көктемнен басталатын жаңа күнге үлкен үмітпен қарайды.
Көктемнің алғашқы мерекесі – Халықаралық әйелдер күнінен басталып, тіршіліктің тұма басы – аналарды құрметтеудің қаншалықты маңызды екені ұрпақтарымызға ұлағат етіледі. Алайда, көп жағдайда абыр-сабыр думанның қызығымен анаға жасалуы керек құрметті бір бума гүлдің тасасында қалдырып жатамыз. Қара жерді тең басып жүрген әрбір перзент анаға ерекше құрмет жасауға міндетті және ар алдындағы парызым деп түсінуі шарт.
Қармақшы ауданының тумасы, белгілі меценат Рзақұл Нұртаевтың бастамасымен «Аналарды ардақтайық» жобасы аудан көлемінде іске асырылып келеді. Жобаның жас ұрпаққа берері мол. Ұлттық тәрбие сіңген ұрпағымыздан күтеріміз де кем болмасы анық. Жуырда Ш.Төлепова атындағы аудандық мәдениет үйінің ұйымдастыруымен ел Тәуелсіздігінің 30 жылдығы және «Аналарды ардақтайық» жобасы аясында ұлағатты ұстаз, тыл ардагері Ақбалыш Жалғасқызын еске алуға арналған «Ұстаз-ана» атты онлайн облыстық жазба ақындар мүшәйрасы және «Анаға сәлем» атты аудандық бейнероликтер байқауын өткізді.
Ақбалыш Жалғасқызы еңбек жолын 1949 жылы Ворошилов мектебінде мұғалімдіктен бастаған. 1948 жылы Н.Гоголь атындағы педагогикалық институттың қазақ тілі мен әдебиеті факультетіне оқуға түсіп, оны 1955 жылы бітіріп шығады. 1949 жылдан бастап Тұрмағанбет, Ақжар, Жаңақала ауылдық округтеріндегі орта мектептерде ұстаздық қызмет атқарған.
Екінші жаһан соғысы жылдарынан кейін елдегі азаматтарды жаппай сауаттандыру, хат таныту жұмыстарына белсене араласқан. Ол жылдары сыныптағы оқушылардың жас ерекшеліктері әртүрлі болатын. Осындай қиыншылықтарға қарамастан, өзінің мамандығын сүйіп, еліне адал қызмет еткен ұстаз оқумен бірге оқушыларды өнерге, шығармашылыққа баулыған. Түрлі үйірмелер ашып, әдеби шығармалардан сахналық қойылымдар дайындауға, балаларды бейіміне қарай өнерге баулыған. Бұл шығармашылық жұмыстарға мектептің жас мұғалімдерін де қатыстырып, таланттарын шыңдауға атсалысқан.
Ол Жосалы кентіндегі Ү.Томанов атындағы №183 орта мектепте қазақ тілі мен әдебиеті пәнінің озат мұғалімі болып қызмет етіп, құрметті еңбек демалысына шықты. Тәжірибелі ұстаз А.Жалғасқызының жұбайы, өмірдегі серігі, белгілі ұстаз, тарихшы, зерттеуші – Сәден Нұртайұлы. С.Нұртайұлы – «Ислам және Марал баба», «Дін кереметі», «Имандылық иірімдері» және «Кең даланың ұлылығы» атты кітаптардың авторы, «Оқу ісінің үздігі», облыстық дәрежедегі зейнеткер, Қармақшы ауданының құрметті ақсақалы болды. Сәден Нұртайұлы мен Ақбалыш Жалғасқызы отбасында 5 бала тәрбиелеп өсірді.
Асыл ана 2017 жылы өмірден озды. Дүниедегі ең ардақты, абзал жан – ана қандай құрметке де лайықты. Тыл ардагері, 45 жыл өмірін ұрпақ тәрбиесіне арнаған Ақбалыш Жалғасқызының өнегелі өмірін өлеңмен өрнектей отырып, келелі істерін ұрпаққа дәріптеу байқаудың негізгі мақсаты болатын. Жыл сайын дәстүрлі түрде өтетін мүшәйраға биыл 24 талапкер қатысты. Оған белгілі жыршы, ҚР Мәдениет қайраткері Берік Саймағанбетов, Зарипа Тасымова, ақындар Ғазиза Әбілда, Қуат Адис қазылық етті.
Арнау жырын ұсынған ақындар арасында қармақшылық Сырым Әділбектің өнері озық шығып, бас жүлдені иеленді. Бірінші орын шиелілік Гүлмира Жусанбаеваға, екінші орын қызылордалық Айдар Сайлауовқа бұйырды. Келесі жүлделі орынды аралдық Данияр Тәңірберген мен шиелілік Бекжан Ержігіт бөлісті.
Алдағы уақытта ұлттық дәстүрді дәріптейтін мұндай шаралар жалғаса береді. Анаға құрмет елге, жерге, отансүйгіштікке жасалатын асыл парыздың бастамасы болып қала бермек.
Арнұр КӨШЕНЕЙ,
Ш.Төлепова атындағы мәдениет үйінің
директоры,
ҚР Мәдениет саласының үздігі.
Қармақшы ауданы
>>> Біздің Facebook, Instagram парақшаларымыз бен Telegram каналымызға жазылыңыз! <<<
