Қаржы саласының жұмысы күрделі де жауапты екені белгілі. Өйткені, ол – мемлекеттің, облыстың, қаланың, ауданның бюджетін құрауға, оның сапалы орындалуына тікелей жауап беретін сала. Тәуелсіздіктің алғашқы жылдары Елбасының бастамасымен қабылданған «Қазақстан-2030» стратегиясының негізгі басымдығы ретінде экономикалық өсу міндеті тұрды.
1991 жылы ҚР «Салық жүйесі туралы» заңы қабылданды. Бұл кезең нарықтық экономикаға енді ғана бет бұрған кезең болатын яғни, өте күрделі кезең еді. Осы тұста аймақтың қаржы тайқазанына жауапты болған, ішкі мемлекеттік аудит департаментінде ұзақ уақыт қызмет еткен Сайлау Нұрсейітовтің еңбегі мен ұйымдастырушылық шеберлігін атап өткен жөн.
Ол Тәуелсіздік алған алғашқы жылдары саласының бастаушылары қатарында оның дамуына өз білімімен, жинақтаған тәжірибесімен үлкен үлес қосып, жақсы ұйымдастырушы екенін көрсете білді. Сайлау Нұрсейітов 1959 жылы Алматы қаласындағы Орталық тұтынушылар одағының кооперативтік техникумын бітірген. Еңбек жолын облыстық тұтынушылар одағының мекемесінде бас есепші болып бастаған.
Сала ардагері қызметтегі алғашқы жылдары туралы: «1962 жылдың басында Жамбыл, Қызылорда, Оңтүстік облыстарын таратып «край» құрды. Орталығы Шымкент қаласы болды. Облыс орталығындағы әкімшілік таратылып, біраз қызметкерлер сонда ауысты, біразы жұмыссыз қалды. Осыған байланысты Сырдария ауданы таратылып, Тереңөзек ауданына қосылды, аудан орталығы Тереңөзек қыстағы болды. Біз аудандағы тұтынушылар одағына есеп беретін болдық.
Тасбөгеттен Тереңөзекке есеп-қисап тапсыру үшін жаяу-жалпы Қараөзектен паром арқылы өтіп баратынбыз. Ертең не ішеміз, отбасын қалай асыраймыз, ақша жинайық, келешек керек болар деген ой бізде болған емес. «Тапқанымыз – тамағымызға» деп, жүріп жаттық. Біреуден бірнәрсе алайық деген ой үш ұйықтасақ түсімізге кіріп те шыққан емес. Ата-анамыздың: «Таза жүр, ешкімнен ешнәрсе сұраушы болма. Біреуден сұрағанның қайыры болмайды» деген сөзі бойға сіңіп кеткен» деп жазған екен.
Жазбадан қаржыгер жай мамандық емесін аңғаруға болады. Бұл саланы игергендердің ішкі жан-дүниесі мен ойлау қабілеті бір арнаға тоғысуы керек. Себебі қаржыгер үшін әділдік ең бірінші орында тұруы тиіс. Ақшамен жұмыс істеу, өз кезегінде жауапкершілік пен белсенділікті талап етеді.
Сайлау Нұрсейітов 1972-1997 жылдары облыстық жолдар басқармасында, Сырдария ауданы Айдарлы кеңшарында бас есепші, Қаржы комитетінің аудандағы бас бақылаушы-тексерушісі, аудандық мемлекеттік сақтандыру мекемесінде, қаржы бөлімінде басшы қызметтерін абыроймен атқарды.
1997-2001 жылдары облыс бойынша қаржылық бақылау басқармасында аға бақылаушы-тексеруші болып еңбек етіп, зейнетке шықты. ҚР Қаржы министрлігі Ішкі мемлекеттік аудит комитеті облыс бойынша департаментінің құрметті ардагеріне Сырдария ауданының «Құрметті азаматы» атағы берілген.
Өңірдің әлеуметтік-экономикалық өсуіне өлшеусіз үлес қосқан Сайлау Нұрсейітов 2020 жылы өмірден озды. Отбасында үлгілі әке, әулетке аға болған азамат жары Жансары Адыранқызымен үш перзент тәрбиелеп өсірді. Қазір ұлдары Нұрлан мен Рахымжан, қызы Айгүл де жауапты қызметтерде еңбек етіп, ел дамуына өз үлесін қосуда.
Биболат СӘТЖАН,
«Сыр бойы»
>>> Біздің Facebook, Instagram парақшаларымыз бен Telegram каналымызға жазылыңыз! <<<
