«Тағдырдан қашсаң да құтыла алмайсың» деген рас-ау. Табиғатынан кішіпейіл, адамгершілігі мол, сабырлы, қай тірлікке де тындырымды, тиянақты Батырбек ағамыздың бұл өмірден көргені аз емес екен. Жастайынан жүрек қалауы мал дәрігерлік-зоотехникалық институтқа қайта-қайта барып, ақыры оқуға түсіп, бір-екі жыл оқығаннан кейін қатты сырқаттанып қалды.
Содан үш жылдан астам уақыт аурумен арпалысып, ақыры жеңіп шықты. Сөйтіп, Алматыдағы мал дәрігерлік институтты тәмамдап, ауылға оралды. Әкесінен дарыған асыл қасиеттер төзімділік, салмақтылық, терең ойшылдық Батекеңді алға ұмтылдырды. Туған ауылы Ақсуда зоотехник, аудандық ауыл шаруашылығы басқармасы бастығының орынбасары қызметтерінде болды. Тиянақты да тындырымды істерімен танылған Батырбекке зор сенім артылып, ол «Аққыр» және «Еңбек» шаруашылықтарында директор болып қызмет атқарды. Адалдық пен турашылдық, адамдармен тіл табыса білу, жұмысшыларға барынша қолайлы жағдай жасау секілді қағидаларды үнемі назарда ұстаған басшы сонау 1986-1992 жылдары «Аққыр» шаруашылығын аяғынан тік тұрғызды. Нарық талабына ілесе алмай қырықшақты қожалыққа бөлінген шаруашылықты топтастырып, тірлігін жандандырды. Кездескен кедергілерге қарсы тұра білді. Әсіресе су тапшылығы мен қуаңшылық сан мәрте кездесті. Сол бір кездері Ресей тарапынан «Қызылқұмда» скважиналар қазылып, жерасты суларының бәрі космодромға тартылған болатын. Малдың сусыз қалатын күндері болды. Осы мәселемен жоғарғы жаққа дейін шығып, ақыры мәселе өз шешімін тапты. Аудан орталығынан шалғай орналасқан мал шаруашылығымен айналысатын халық білікті басшының қамқорлығы арқасында қиындық құрсауынан құтылып, жаңаша өмір сүре бастады.
Мұнан соң Еңбек ауылында шаруашылық директоры болып қызмет атқарды. Халықпен тіл табысып, мүмкіндігінше жағдай жасап, жұмыстардың ілгері басуына ұйытқы болды. Бұл шаруашылықтың да алдыңғы қатардан көрінуіне айрықша күш салды, абыройсыз болған жоқ.
Тектінің ұрпағы Батырбек Мәншәріпов Жалағаш ауданы әкімінің орынбасары, аудандық ауыл шаруашылығы басқармасында да жемісті еңбек етті. Аудан экономикасы мен әлеуметтік дамуына өзіндік үлес қоса білді. Қай қызметте жүрсе де халықтың ыстық ықыласына, сүйіспеншілігіне бөленді.
Көршілес Сырдария ауданында да түрлі қызметтер атқарып, көпшілік көңілінен шықты. Алдымен аудандық аумақтық басқармада, одан кейін аудан әкімінің орынбасары болды. Кейінгі жылдары Сырдария аудандық мәслихат хатшысы қызметін атқарды. Әкесі айтқан ақыл-кеңестер, берген тәлім-тәрбие оған үлкен қолдау болды. Қай жерде жүрсе де халықтың мұң-мұқтажын, талап-тілегін уақытында орындауға тырысты. Істің көзін тауып, елге жақсылық жасауды басты міндетім деп түсінді. Жаны ауырса да ешкімге білдірген жоқ. Жүрегі сыр берсе де, ауырдым деп аурухана жағаламады. Қызметінен қалмай, елмен бірге болды.
Халықтың қалаулысы ретінде тұрғындардың аманатына жауапкершілікпен қарап, Іңкәрдария және Ақжарма ауылдарында ауызсу мәселесінің шешілуіне ұйытқы болды. Батырбектің арқасында Іңкәрдария ауылына ауызсу келіп, жұртшылық көкөніс-бақша егіп, көшелерге тал отырғызылып, ауыл тірлігі жанданды. Ақжарма ауылының да қазіргі келбеті адам қызығарлықтай.
Біреу білер, біреу білмес, Тереңөзек кентінің жаңа қоныстану аймағының құрылыс алаңына айналып, сәулетті тұрғын үйлердің көптеп салынуында Батырбек Мәншәріповтің өзіндік қолтаңбасы, үлесі бар. Бұрын бұл маң орман шаруашылығының меншігіне өтіп, бос жатқан болатын. Болашақты ойлаған, кенттің жаңа тынысын ашуды көздеген, халықтың жер алып, баспаналы болуын қалаған Батекең облыс, аудан әкімдерінің тапсырмасымен елорда төріндегі министрліктерге дейін барып, жалпы көлемі 488 гектар жердің Тереңөзек кентінің теңгеріміне алынуына айрықша еңбек сіңірген.
Аудандық бюджет есебінен С.Сейфуллин ауылында тұңғыш рет балабақша салынды. Сол кездегі аудан әкімі Ғанибек Қазантаевпен бірге мәслихат хатшысы ретінде аудан орталығынан бастап барлық елді мекендердің дамуына зор еңбек сіңірді.
Айта берсек тектінің ұрпағы Батырбек Мәншәріповтің халық үшін сіңірген еңбегі орасан. Екі ауданда да өзінің қабілет-қарымымен, адамгершілік асыл қасиеттерімен танылып, екі ауданның Құрметті азаматы атағын алды. Өз сөзінде Батекең: – Мен атақ алу үшін емес, дос-жаран жинау үшін және әкемнің айтқанындай, елге қызмет ету үшін қолымнан келгенін аяғаным жоқ. Бұған алдыңғы толқын ағаларым, замандастарым, басқа да жаны ашитын кісілер өз көмегін берді, зор ықпалын тигізді. Сондықтан оларға шын жүректен ризамын, – деді.
Өмірінің негізгі байлығы балалары екенін Батекең сүйсіне әңгімелейді. Құдай берген балаларының өзі қалағандай білім алып, бірі дәрігер, бірі заңгер, бірі қаржыгер, бірі ұстаз болғанын мақтан етеді. Жан-жақта жүрсе де әке аманатына адал ұл-қыздарының өз атына кір келтірмейтініне сенімді. Немере-шөберелерінің қызықтарын көріп, жұбайы Сафура екеуі өткен кезеңдердің қиындықтарын ұмытып, бүгінгі күннің бақытын сезініп отырғандай.
Мейрамбек ШІЛДЕБАЙҰЛЫ.
Тереңөзек кенті
>>> Біздің Facebook, Instagram парақшаларымыз бен Telegram каналымызға жазылыңыз! <<<
