Тау алыстаған сайын биіктейді. Біз туған өлке мидай жазықта орналасқан. Десе де, айбат-айбары тау шыңындай еңселі ағаларымыз аз емес. Сондай ағаларымыздың бірі Әбубәкір Теміров еді. Оның өзі ғұмыр бойы тер төккен туған жерінің топырағын жамылып, мәңгі тыныстап жатқанына да біршама жыл өтті. Әйтсе де, халқы арда ұлын ұмытқан жоқ. Ұлықпан хәкім мың жасапты демей ме? Әрине, ұрпағымен. Әбекең мен Маржан анамыздың бауырынан өрбіген перзенттерінің баршасы бұл күнде ат жалын тартып мініп, сан салада қызмет жасап, әулет абыройына, әке есіміне дақ түсірмеуге тырысып-бағуда.
Әбекеңді біршама білуші едім. Тонның ішкі бауындай етене араласпасам да сәлеміміз түзу болды. Газет тілшісі ретінде жүздесіп жүрдім. Ауыл баласы болғандықтан шығар, ауыл шаруашылығы бағытында әңгімеміз үйлесім табатын. Жасы әкеммен қатарлас Әбекең мені ешуақытта қомсынған емес. Әңгіме желісі мал өнімдерін өңдеу жайына ойысқанда ағамыз қатты қынжылатын. Әсіресе, кезінде құны алтынмен тең түйе жүні, қой жүні, мал терісінің итрәсуа болып, іріп-шіріп жатқанына алаңдайды. Мұндайда Әбекеңнің жан дүниесіндегі ренішін түсінуге тырысасың. Көпті көрген білікті маманды іштей қолдайсың. Қыстың қытымыр аязында, жаздың ми қайнатар аптабында тыным көрмейтін малшы ағайынның есіл еңбегі еш кетіп жатса, шаруа жайына қанық дала перзенті қалайша күйінбейді?
Өзгеге ұсақ-түйек, ауыл адамына аса маңызды жем-шөп дайындау, мал төлдету, төрт түлік арасында кездесетін түрлі кеселден сақтану, басқа да тақырыптарды қаузаса, ағамыз хас дүлдүлдей дүр сілкінетін. Ғылыми негізге сүйене отырып, қызықты деректер келтіргенде еріксіз сүйсінесің. «Осындай көкірегі көмбеге толы аға буынның өмірлік бай тәжірибесін күнделікті тіршілікте пайдаланса ғой, шіркін….» деп күрсінесің. Бірақ…
Әбубәкір Теміров 1930 жылы Қазалы ауданына қарасты №2 ауылда, бұрынғы Жамбыл атындағы колхозда дүниеге келген. Балалық шағы әлемді шарпыған Ұлы Отан соғысының ауыр жылдарына тұспа-тұс келгендіктен, қара жұмыстың қазанында ерте шыңдалды. «Бәрі де майдан үшін, бәрі де Жеңіс үшін!» деген ұранды құлағына сіңіріп өсті. Сол қасіретті кезеңде елдегі өмірді өрге сүйреген ауылда қалған қарттар мен әйелдер, бала-шаға болғаны тарихтың сарғайған парақтарынан мәлім. Десе де, ауыр бейнетке ешкім қабақ шытпады. Жеңіс туы желбірейтініне бәрі сенді. Сол сенім қарапайым жұрттың намысын жаныды, жігер-күшін селдей тасытты.
Қазалы қаласындағы мал дәрігер-зоотехникалық техникумын бітіргенде Әбекеңнің жасы небәрі 17-де болатын. Диплом алысымен қызу еңбекке кірісіп кетті. Арада тағы жылдар өтті. Ізденуге құштар жас алған білімімен шектелуді жөн санамады. Алматы зоотехникалық-мал дәрігерлік институтына құжат тапсырып, оны ғалым-зоотехник мамандығы бойынша үздік бағаға тәмамдады. Бойында жігері жалындаған жас маман институттан кейінгі еңбек жолын Қазалы мал дәрігер-зоотехникалық техникумында мұғалім болып жалғастырды.Кезінде өзі білім нәрімен сусындаған оқу ордасында енді ұстаз ретінде шәкірттер тәрбиеледі.
Білікті де тындырымдылығымен танылған орда бұзар жастағы ұстаз арада уақыт өте Қазалы аудандық ауыл шаруашылығы инспекциясының бас зоотехнигі лауазымына шақырылды. Қанға сіңген пісенттілік, ізденімпаздық, темірдей тәртіпті ұлықтаған дағдысы Теміровтің жұлдызын жандырды. Облыстық партия комитетінің ауыл шаруашылығы бөлімінің нұсқаушысы, Жаңақорған ауданы партия комитетінің екінші хатшысы қызметін атқаруы басшылықтың оған деген сенімі-тұғын. Бір сәт дерекке көз жүгіртсек.
Шиелі, Жаңақорған аудандарының қосылуына байланысты Әбубәкір Теміров Шиелі аудандық өндірістік басқармасы бастығының бірінші орынбасары және аудандық партия комитетінің бюро мүшесі болды. 1965-1970 жылдары Қазалы аудандық өндірістік басқармасының бастығы, 1970 жылдан Шиелі ауданы ауыл шаруашылығы басқармасы бастығының бірінші орынбасары қызметін атқарды. 1971-1991 жылдар аралығында Шиелі ауданы Сырдария совхозының директоры, аудандық дайындау кеңсесінің директоры, аудандық жоспарлау комитетінде жұмыс жасап, содан соң жұмыспен қамту орталығының меңгерушісі болып еңбек етті. 1990 жылдан республикалық дәрежедегі дербес зейнеткер атанды. Осы жылдар аралығында Жаңақорған, Қазалы, Шиелі аудандарында аудандық партия комитеттерінің бюро мүшесі, аудандық партия комитетінің мүшесі, аудандық Кеңесінің депутаты, облыстық партия комитетінің конференцияларына делегат, облыстық Кеңеске депутат болып сайланды. Жоғары өндірістік көрсеткіштерге қол жеткізгені үшін Қазақ КСР Жоғарғы Кеңесінің сессиясына арнайы шақырылып қатысты. «Еңбек Қызыл Ту», «Құрмет белгісі» ордені, көптеген медальдарымен наградталған. КСРО Халық шаруашылығы көрмесіне (ВДНХ) қатысып, қызметтегі қол жеткізген жетістіктері үшін көрменің жоғарғы дәрежелі медалімен, облыстың Құрмет грамотасымен марапатталды.
«Жақсының аты, ғалымның хаты өшпейді» демекші, Әбубәкір Теміровтің ізінде қалған ізгі істері, үлгі-өнегесі көмескіленбей, уақыт өткен сайын жарқырай бермек.
Жұмабек ТАБЫНБАЕВ,
«Сыр бойы»
Қазалы ауданы.
>>> Біздің Facebook, Instagram парақшаларымыз бен Telegram каналымызға жазылыңыз! <<<
