1929 жылдың 1 шілдесінде «Сыр бойы» газетінің алғашқы саны Қызылорда қаласында 2000 таралыммен шықты.
1930 жылғы 101 санынан бастап Қызылорда, Шиелі, Тереңөзек, Аламесек, Қармақшы, Қарсақбай, Қазалы, Арал аудандық партия, кеңес комитеттері мен одақтарының органы болды.
1932 жылдың қаңтарында газет атауы «Ленин туы» деп өзгертілді.
1938 жылы облыс құрылғаннан кейін 22 наурыздан бастап ол облыстық «Ленин жолы» газеті деп аталды. Редакцияның мекен-жайы Қызылорда қаласындағы Дзержинский көшесі, 10 үйде болды.
1941-1945 жылдары газет жұртшылықты «Бәрі де майдан үшін, бәрі де жеңіс үшін!» деген жалпыхалықтық ұранға жұмылдырды.
Соғыстан кейінгі жылдарда журналистер Одақтағы, республика мен облыстағы оқиғаларды кеңінен насихаттады. Әлем жаңалықтары, ТАСС хабарлары газеттің әр санында жарияланды.
1960 жылдары газет оқырмандарының саны 20 мыңға жетті. Редакция К.Маркс көшесіндегі 34 үйге орналасты.
1968 жылдың қаңтар айынан бастап газет өзінің әдепкі шығу мерзімін «1929 жылдың 1 шілдесінен» деп өзгертіп жазды.
1970 жылдары басылым бетінде республиканың басқа облыстарының да тыныс-тіршілігінен арнаулы беттер ұйымдастырылды. Мәселен, 1970 жылдың тамыз-қыркүйек айларында Қарағанды, Целиноград, Гурьев, Оңтүстік Қазақстан, Жамбыл облыстары материалдар дайындалыпты.
Осы кезеңде қазақтың айтыс өнеріне де мән беріліп, газет облыстық ақындар айтысында сөз қағыстырған жаңақорғандық М.Көкенов пен шиелілік Ш.Өтеевтің айтысын жариялады.
1972 жылдың шілдесінде «Ленин жолының» 10 мыңыншы нөмірі жарық көрді. Осыған орай Қазақ ССР Жоғарғы Кеңесінің Құрмет Грамотасымен марапатталды.
Облыстық газет редакциясы 1973 жылы жаңа қонысқа көшті. Ол Коммунистік проспектісі, қазіргі Абай даңғылы 60 үйге орналасты.
1977 жылы «Ленин жолы» КСРО Журналистер одағының Құрмет дипломы мен қаржылай сыйлығын иеленген.
1979 жылы шыға бастағанына 50 жыл толуына орай басылым КСРО Жоғарғы Кеңесі Президиумының жарлығымен «Құрмет Белгісі» орденін алған. Сол жылы социалистік жарысты үздік ақпараттандырғаны үшін газет пен оның қызметкерлері КСРО Журналистер Одағы конкурсының жеңімпаздары атанған.
1983 жылы социалистік жарысты ақпараттандыру үздігін анықтайтын бүкілодақтық конкурсының жеңімпазы ретінде «Ленин жолы» газеті Бүкілодақтық халық шаруашылығы жетістіктері көрмесінің (ВДНХ) «Советская печать» павильонына қойылды.
1987 жылы газет таралымы 53 мыңға жетті.
1989 жылы газет 65450 данамен тарады.
1991 жылдың 24 қыркүйегінде газет өзінің байырғы «Сыр бойы» атауын қайта иеленді.
1998 жылы газет офсеттік тәсілмен жарық көре бастады.
2004 жылы «Сыр бойы» газеті «Мұнай – Қазақстан дамуының игілігіне» республикалық конкурсында «Үздік басылым», «Ауылды қолдау жылы» аясында өткен республикалық конкурста жүлдегер атанды.
2005 жылы «Сыр бойы» Қазақстан Журналистер академиясының ең мәртебелі жалпыұлттық журналистік сыйлығы – «Алтын жұлдызды» «Үздік аймақтық газет» номинациясын иеленді.
2006 жылы ҚР Президентінің бұқаралық ақпарат құралдары саласындағы грантын мемлекеттік бағдарламалардың өңірде жүзеге асырылу барысын терең әрі жан-жақты көрсеткені үшін алды.
2010 жылы басылым аймақтың белді бұқаралық ақпарат құралдарын біріктірген «Сыр Медиа» ЖШС-на кірді.
2013 жылы серіктестік жаңа қоныс – Т.Жүргенов атындағы Шығармашылық үйіне орналасты.
Наргиз САМАТҚЫЗЫ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
