Жыл басында жарық көрген Президент Қасым-Жомарт Тоқаевтың «Тәуелсіздік бәрінен қымбат» мақаласындағы «Салт-дәстүрімізден ажырап қалмау – барлық өркениеттер мидай араласқан аласапыранда жұтылып кетпеудің кепілі» деген ой ойды қозғады.
Егемен еліміздің даму барысында талай серпінді жоба сәтті жүзеге асып, көптеген тарихи жәдігерлер жинақталды. Ендігі кезекте оны сақтап қалып, бұқара халыққа насихаттау аса маңызды.
«Кезінде «Мәдени мұра» бағдарламасы ұлт шежіресін түгендеуге жол ашты. Отандық тарих ғылымы тың серпінмен дамып, түрлі бағыттар бойынша көптеген зерттеу жүргізілді. Бұрын бәймәлім болған қаншама тарихи деректер, археологиялық қазыналар табылды. Тарихымыз сан мың жылдан тамыр тартатынын айғақтайтын жаңалықтар ашылды. Елбасының осындай іргелі бастамалары халқымыздың тарихи санасын жаңғыртуға зор үлес қосты. Бағдарлама аясындағы еңбектер том-том болып жарыққа шықты. Дегенмен, сол қажырлы еңбектің жемісін көпшілік көріп отыр ма? Зерттеу жобаларының біразы ғылыми институттар мен орталықтардың аясында ғана қалып қойған жоқ па?» деген сауал әсіресе, ғылыми ұйымдар мен музейлерге қатысты екені баршамызға мәлім.
Осыған орай еліміздің алғашқы астанасы – Қызылордада өшпес мәдени мұрамызды сақтап қалып, өскелең ұрпаққа аманат етіп тапсыру бойынша жасалып жатқан жұмыстар туралы айтсам.Тұңғыш қазақ музыкалық драма театры ашылған, ұлт үшін маңызды шешім қабылданған тарихи ғимарат үлгісімен салынған «Рухани жаңғыру» орталығы, көне қалашықтар мен көптеген аса құнды мәдени нысандар өңірімізде орналасқан. Одан бөлек, «Сыр елі – жыр елі, қазақылықтың мекені» аталып кеткен туған өлкеміз атақты суретшілер мен жазушылар, әншілер мен артистердің туған жері. Тарихи-өлкетану музейінің көпшілік жиі баратын, қызығып тамашалайтын орындардың бірі екені де сондықтан болар.
Сұранысқа сай музей ұжымы да экспонаттарды кеңінен насихаттауға, жұмыстың жаңа форматтарын игеруге ұмтылады. Мәселен, «Музейдегі түн», түрлі ашық көрмелер мен экскурсияларды ұйымдастырып тұрады. Оның ішінде әлеуметтік аз қамтылған халық топтары үшін экскурсиялар тегін өткізілетінін ерекше атап өткен жөн.
Жастардың мәдени құндылықтар туралы танымын кеңейтуге арналған «Жас экскурсовод» атты тың жобамыз бар. Оның аясында балалар мен жасөспірімдерге Сыр өңірінің көрнекі жерлері туралы айтып береміз. Әрине, аймағымыздағы білім беру ұйымдарымен бірлесе бірқатар зерттеу жұмыстары жүргізіліп, нәтижесінде ашылған жаңалықтарымыз да аз емес. Мәселен, «Музейге сый» науқаны аясында талай құнды жәдігерлер анықталып, музей қорына өткізілді. Жақында көрнекі ақын, аудармашы Ә.Тәжібаевтің қолданған мылтығы музейге табысталып, бұқара халықтың қызығып тамашалайтын экспонаттарының біріне айналмақ.
Бұл – жасалып жатқан жұмыстардың бір бөлігі ғана. Атқаратын жұмыстарымыз әлі де жетерлік. Қасиетті жеріміздің өшпес мұрасын жаңғыртуға, туған жерге құрмет үлгісін көрсетуге бос уақытымызды аямайық. Жастар туған өлкемізбен мақтансын, келешекте оған қызмет етуді мұрат етсін. Абыройын одан сайын асқақтатуға өз үлестерін қоссын!
Алтын КӘРБОЗОВА,
Қызылорда қала тарихы музейінің қызметкері
>>> Біздің Facebook, Instagram парақшаларымыз бен Telegram каналымызға жазылыңыз! <<<
