Зеңгі баба сиырдың ішінде жатқан бұзаудың түр-түсін нақтап айтып, жаңылмай табатын көріпкел әулие болған. Оның өмірлік қосағы Әнуар ананың да іштегі бұзаудың қандай екенін ажырата алатын сыншылық қасиеті бар екен. Осы бір бағзы заманның оқиғасын айтушылар оны әртүрлі әулиелердің аузына салып жүр. Бұл – дұрыс емес. Әр аңыздың өз ақиқаты, әр киенің өз иесі бар.
Оқиға былай:
Бірде бабаның зайыбы ерінен:
– Мен сіздің әулиелік ісіңізге ортақпын ба? Сауапқа серікпін бе? – деп сұрапты. Зеңгі оған:
– Мен тақуамын, таза ісіммен әулиелікке иемін. Бұл қасиет өзімнен, оған сен ортақ емессің, – депті.
Әнуар ана ері Зеңгіні ерекше ықыласымен күтіп, ас-ауқатын таза дайындап, қызмет еткен. Ол ас дайындағанда ыдыстарды тоғыз мәрте жуып-шаятын көрінеді.
Бір күні Әнуар ана түс мезгілінде ас дайындап жатып, ауқаттың ішінде әлдененің қараң ете қалғанын көзі шалады. Бірақ әлгі қылдай нәрсені тамақты қанша сапырып іздесе де таба алмайды. Шамалап астың бір-екі шөмішін алып, төгіп те тастайды. Содан не керек, өрісте ыстық күннің астында қуырылып өзін күткен ерінің жай-күйін ойлап, ауқатты алып асыға жетеді. Баба тамақты ішіп алады.
Арада біраз уақыт өтеді. Бірақ, Әнуар ананың көңілінен күмән кетпейді. Соны байқау ниетімен иіріле жатқан сиырдың шеткі біреуін қолымен нұсқап:
– Анау сиыр қандай бұзау туады екен? – деп сұрақ қояды.
– Түсі қызыл, маңдайы қасқа бұзау туады, – деп жауап береді ері. Сонда жұбайы:
– Меніңше, маңдайы емес, құйрығының ұшы ақ, қызыл бұзау туады, – дейді.
Әзірге әңгіме осымен тәмам болады. Уақыты жеткенде Әнуар ананың айтқанындай құйрығының ұшы ақ, түсі қызыл бұзау туады.
Сонда бабамыз:
– Мен қалай жаңылдым? – деп сұрапты.
– Осы бұзаудың түр-түсі әңгіме болған күні әкелген ауқатты істеп жатып ішіне бір ноқаттай қара дақтың түсіп кеткенін байқадым, бірақ алып тастамақ болып қанша іздесем де, таба алмадым. Сол қара дақ көзіңізге перде боп тұтылып, іштегі бұзаудың түсінен жаңылдыңыз. Шын мәнінде бұзаудың ұшы ақ құйрығы қайрылып, аяғының арасынан өтіп, маңдайына тиіп жатыр еді, – дейді жұбайы. Мұны естіген бабамыз:
– Менің әулиелік қасиетімнің сенің жасаған қылаусыз таза қызметіңмен байланысты екенін түсіндім. Егер сен тазалығыңнан сәл ғана мүлт кетсең, менің қасиетім де жарым-жартылап, толық күйде бола алмайды екенмін, – депті бабамыз.
Қазақтың келіндеріне орамал тартқызуының бір ғибраты осы тазалыққа байланысты екенін кейбіреулер аса түсіне бермейтін сияқты. Өйткені, келіндердің «ата-енем барда орамал тақтым, енді үйде ешкім жоқ қой» деп асханада орамалсыз тамақ істеп жатқанын өзім талай көрдім.
Шаштың адамды ғарышпен байланыстыратын тылсым сыры бар дегенді білесіз бе? Ұзын шаш ғарыштан келген күшті көбірек алады екен, сондықтан оның түйсікке жол ашатын әсері бар. Әйелдің энергетикасы, отбасын сақтайтын жылулықтың бәрі шашта сақталады дейді ғалымдар. Шашты неғұрлым қысқа қиған сайын, соғұрлым әйелдің энергетикасы азая түседі. Қазақтың «шашы ұзын, ақылы қысқа» деп ақылды шаштың өлшеміне салуы тегін бе?
Қысқа шаш ақылға кері әсер еткенімен, әйел бойындағы күрескерлік, белсенділік көзін аша түседі-міс. Қысқа шашты әйелдің билікке ұмтылып, отбасын екінші орынға қойып жататыны жасырын емес. Ал, ұзын шашты әйел отбасы берекесін сақтап, нағыз жар атануға ұмтылады.
Қазір шашты жайып жүру сән саналады. Халқымызда әйелдің шашын жаюы қаралы жағдайдың көрінісі болған. Жайылған шаш әсіресе, күн батқан мезгілде адам бойына жағымсыз энергияны жинайды, үлкендердің «түнде далаға шыққанда басыңды жауып шық», немесе «бас киіміңді киіп шық» дейтін ескертуі осыған байланысты. Бұған қоса жайылған шаш әр жерге түсіп, адамның биоэнергиясын аяқасты қылады, мұның сол адамның өзіне тигізер кесірі де жоқ емес. Бала күнімізде шешеміз шашымызды алып, қиындыны көміп тастайтын. Бірақ, оның сырын түсінген біз бар ма?
Бүгінде бәріміз де шаштараз қызметін пайдаланамыз. Олар алынған шашымызды сыпырып, қоқысқа лақтыра салады. Бұл әрекеттің адамның бас ауруға шалдығуына әкеліп соқпайтынына кім кепіл? Себебі біздің бойымыздағы ғарыштан келген қуат шашпен бірге аяққа басылады. Ал, осы энергия бізден ажырағанмен, өз ағзамызға әсер ету әрекетін жоймайды екен.
Мына нәрсені түсінуіміз керек. Үлкейген сайын кез келген адамның шашы да сирейді. Демек, оның ғарыштан алып тұрған қуаты да бәсеңдей бермек. Қазақтың «шашы қайратты екен» дейтін теңеуін естіген шығарсыз. Ол бойдағы ғарыш қуатының күші мол деген сөз.
Ата-бабамыз ғарыштың сырын тоғызқұмалақ ойнап отырып-ақ білген. Өйткені, адамның аспанмен байланысы іште жатқан сәтінде-ақ басталады. «Бүгінде жұлдызнама деген шықты» дейміз кейде. Жұлдызға қарап болжам айту баяғыдан-ақ бар.
Осы біз шашымызға немқұрайлы қарау арқылы көк көлбеп жететін саф байланысымызға селкеу түсіріп алған жоқпыз ба?
Дүйсенбек АЯШҰЛЫ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
