Әлеуметтік желіде ақпараттар ағыны өте көп. Оның рас-өтірігін анықтау да қиын. Тіпті, кейбір жалған ақпаратқа шынымен сеніп қаласыз. Әсіресе, қоғамда маңызды мәселе қозғалған тұста, оны дүрліктіріп жіберетіндер қатары көбейіп барады.
Мәселен, соңғы күндері WhatsApp желісінде алдағы жылдан бастап төленетін жәрдемақыға байланысты 1 және 3 баласы барлар да құжат тапсыра алады, әрі құжат тапсырудың уақыты шектеулі деген қауесеттер таралуда. Бұл ақпарды Еңбек және халықты әлеуметтік қорғау министірлігі де жоққа шығарды. Соның өзінде халыққа қызмет көрсету орталығына құжат өткізуге барғандардың қарасы көп. Осы ретте жергілікті мамандар да бұл ақпараттың жалған екенін айтуда.
– Әр балаға жәрдемақы беріледі не құжат қабылдау уақыты бітіп қалады деген хабар еш шындыққа жанаспайды. Негізінен 2020 жылдың 1 қаңтарынан бастап төрт және одан да көп бірге тұратын кәмелетке толмаған баласы бар немесе күндізгі оқу бөлімінде оқитын 23 жасқа дейінгі студенттері бар отбасыларға мемлекеттік жәрдемақы төленеді. Біздің өңірде мұндай санаттағы арнаулы жәрдемақы алатындардың саны 16826-ны құрайды. Есепте тұрған бұл адамдар автоматты түрде жәрдемақыға ілінеді. Сондықтан оларға құжат тапсырудың қажеті жоқ, – деді еңбек, әлеуметтік қорғау және көші-қон комитеті облыс бойынша департамент басшысының орынбасары Лиман Боранбаева.
Осы жерде құжатты кімдер тапсырады деген сауалдың туындайтыны анық. Л.Боранбаеваның айтуынша, заңға өзгеріс енуіне байланысты 2018 жылы төрт бала туған анаға ай сайынғы төленетін жәрдемақы төлеу тоқтатылған болатын. Осыған орай қазіргі уақытта 2018-2019 жылы төртінші сәбиі дүниеге келген 5915 отбасы ғана құжат тапсыруда. Сондай-ақ, баласы 18-ге толып, күндізгі оқу бөлімінде оқып жатқандар анықтама әкелуі, мекен-жай бойынша әр жерде орналасқандар, отбасы мүшелерін бір жерге біріктіруі тиіс. Бұлар дұрысталмайынша оларға жәрдемақы бекітілмейді. Құжат тапсыруда шектеулі уақыт жоқ. Кез келген кезде келіп тапсыра алады. Өтініш берілген күннен бастап жәрдемақы төленеді.
Қысқасы, жалған ақпарға байланысты даурығудың еш қажеті жоқ. Сол себепті, әрбір азамат ақпарат таратпас бұрын оның қылмыстық жауапкершілікке түрткі болатындығын ескергені жөн.
Мейрамгүл ДАУЫЛБАЙҚЫЗЫ.
>>> Біздің Facebook, Instagram парақшаларымыз бен Telegram каналымызға жазылыңыз! <<<
