Семейде «Қаладан – ауылға» атты пилоттық жоба іске қосылып, тұрғындарға ауылға көшу ұсынылып жатыр. Әкімдік алыс аумаққа көшетіндерге 1,5 миллион теңгеге дейін қаражат береді. Бұл туралы Stan.kz ақпарат агенттігі «24KZ» арнасына сілтеме жасап хабарлайды.
Жобаның мақсаты – ауылдық жерлерді дамыту, кадр тапшылығын азайту және қалалықтарды шалғай елді мекендерге тарту.
“Біз мектеп жасындағы балалары бар отбасыларды шақырамыз. Оларға тұрғын үй, 10 сиыр және бір жылқы береміз. Тұрақты жұмысқа орналастырамыз”, – деді Абай ауданы Медеу ауылдық округінің әкімі Еркебұлан Кеңесбекұлы.
Қала тіршілігінен ауыл өміріне көшуді шешкендерге әкімдік қолдау көрсетеді. Бастапқы жарна үшін отбасыларға 1,5 миллион теңгеге дейін қаражат беріліп, бизнес ашуға немесе мал шаруашылығымен айналысуға көмек көрсетіледі. Кәсіпкерлер 6% жылдық мөлшерлемемен 10 жылға дейінгі жеңілдетілген несиелер мен гранттар ала алады.
“Жер ресурстары бар. Жұмыс істегісі келетіндерге қажетті қолдау көрсетеміз. Өткен жылы бізге екі отбасы көшіп келді. Бұл біз үшін елеулі оқиға болды. Себебі соңғы 10 жылда жаңа тұрғындар болмаған”, – деді Көкпекті ауданы Шұғылбай ауылдық округінің әкімі Нурлан Назарханов.
Бүгінгі күні Абай облысында 600 мыңнан астам адам тұрады. Оның 222 мыңы ауылдық жерлерде. Билік мұнда өсу әлеуетін зор деп есептейді. Жобаның мақсаты – ауыл халқын тек сақтау емес, оны көбейтіп, көшіп келуге тартымды ету.
“Ауылдардың даму әлеуетін арттыру, ауыл тұрғындарының өмір сапасын жақсарту және елді мекендерді жаңғырту қажет. Мақсаттар ауқымды. Бізде ресурстар бар және жалпы нәтижеге жетуге ұмтылысымыз бар”, – деді Абай облысының әкімі Берік Уәли.
«Қаладан – ауылға» жобасы 2028 жылға дейін жоспарланған. Билік ауыл экономикасын нығайтып, жаңа жұмыс орындарын құруды көздеп отыр. Аудан әкімдерінің алдында осы бастаманы іс жүзінде жүзеге асыру міндеті тұр.
