Дүниежүзілік банк (ДБ) Ресей-Украина қақтығысы салдарынан биыл 60%-ға өскеннен кейін 2023 жылы энергия бағасы 11%-ға төмендейді деп болжап отыр. Қытайдағы жаһандық өсудің баяулауы және коронавирусқа байланысты шектеулер рецессияға әкелуі мүмкін. Бұл туралы ҚазАқпарат меншікті тілшісі Reuters-ке сілтеме жасап хабарлайды.
ДБ өзінің соңғы есебінде Brent маркалы мұнай баррелінің орташа бағасы 2023 жылы 92 доллар, 2024 жылы 80 доллар болатынын болжаған. Бірақ бес жылдық орташа көрсеткіш 60 доллардан айтарлықтай асып түскен.
Есепте Еуропалық Одақтың Ресей мұнай-газ өнімдеріне эмбаргосына байланысты Ресей мұнайының экспорты 5 желтоқсанда күшіне енетін сақтандыру және жеткізу шектеулерімен бірге күніне 2 миллион баррельге дейін қысқаруы мүмкін екені айтылған.
«Шикізат бағасының өсуі мен валютаның тұрақты құнсыздануының үйлесуі көптеген елдерде инфляцияның жоғарылауына алып келеді», – деді Дүниежүзілік банктің болжау тобының басшысы Айхан Косе.
Банк мәліметі бойынша, энергия бағасы төмендегеніне қарамастан соңғы бес жылдағы орташа деңгейден 75%-ға жоғары болады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
