Биыл – «Жұмысшы мамандықтар жылы». Бұл – қарапайым еңбек адамдарының қажырлы қызметін бағалап, қоғамдағы мәртебесін көтеруге бағытталған игі қадам. Өзінің адалдығымен, еңбексүйгіштігімен абыройға ие болған қарапайым еңбек майталманының бірі – Күмісбек Тобылов.
Қазақта «Әке көрген оқ жонар» деген тәмсіл бар. Күмісбек Садықұлы да әке жолын жалғап, адал еңбегімен халыққа қызмет етіп жүрген жандардың бірі. Оның әкесі Садық Әбілқасымұлы, автотранспорт саласында ұзақ жыл көлік жүргізушісі болып еңбек еткен. Ардақты әке еңбегі ел тарапынан жоғары бағаланып, «Социалистік жарыстың жеңімпазы» төсбелгісімен төрт рет марапатталған. Сондай-ақ «Еңбектегі ерлігі үшін» медалінің иегері атанған.
Осындай әке өнегесін көріп өскен Күмісбек ағамыз да мектеп қабырғасында жүріп-ақ «Автокөлік жүргізушісі» мамандығын меңгеріп шығады. Алғашқы еңбек жолын «Риссовхозстрой» тресіне қарасты «Тасбөгет автобазасында» бастап, жүктелген міндетті үлкен жауапкершілікпен атқарады. Кейін Кеңес әскері қатарында борышын өтеп, онда да әскери техниканы басқарумен айналысады.
Әскерден оралған соң жаңадан ашылған «Сырдария АТП» мекемесінде еңбек етіп, уақытпен санаспай, тапсырылған жұмысты табандылықпен орындады. Жұмыс істей жүріп сырттай білімін жалғастырып, Шымкент қаласындағы жол-көлік техникумын тәмамдап, техник-механик мамандығын иеленеді.
Тоқырау жылдары талай мекемелер жабылып, халыққа ауыртпалық түскені белгілі. Сол шақта да Күмісбек Садықұлы қол қусырып қалмай, автобус көлігін жалға алып, жолаушылар тасымалдаумен айналысты. Кейін Қызылорда қаласында ашылған «Қатынас» ЖШС автобус паркінде, одан соң 2013 жылы құрылған «Қызылорда автобус паркі» ЖШС-да жұмыс істеп, әріптестері арасында сыйлы жанға айналды. Сондай-ақ «Мелиоратор» ЖШС-да еңбек етіп, ауыр техникаларды жеткізуге атсалысты.
Ауыр жүк көлігін тізгіндеп, күн-түн демей жол үстінде жүру қырағылық пен үлкен жауапкершілікті талап етеді. Күмісбек Садықұлы осы талапты ешқашан естен шығармай, үнемі жолда, еңбектің ортасында жүр. Бұл – оның өз ісіне деген адалдығының айқын көрінісі.
Отбасында асыл жар, қамқор әке, немерелеріне ақылшы ата атанған ол – шаңырағының тірегі. Өмірлік жары Гауһар екеуі екі ұл, екі қыз тәрбиелеп, бүгінде немере сүйіп отырған берекелі әулеттің иелері. Балалары да әр салада еңбек етіп, ел игілігіне қызмет етуде.
Шын мәнінде, қоғамның дамуы осындай қарапайым еңбек адамдарынан бастау алады. Күмісбек Тобылов сынды адал еңбегімен абырой тапқан азаматтар өскелең ұрпаққа үлгі.
Мейрамгүл ДАУЫЛБАЙҚЫЗЫ,
«Сыр бойы»
