Отбасы – шағын мемлекет. Сол шағын мемлекеттің басты тірегі – әке. Әке – шаңырақтың иесі, отбасының қорғаны, тәрбие мен берекенің бастауы. Осы орайда ер азаматтарға артылар жауапкершілік жүгі қашан да ауыр.
Кеше «Сыр жұлдыздары» шығармашылық-инновациялық академиясында «Әке тағылымы – ұлт тәрбиесінің тірегі» тақырыбында облыстық әкелер форумы өтті. Аталған іс-шара отбасылық құндылықтарды нығайтуға, әкенің бала тәрбиесіндегі жауапкершілігін арттыруға, сондай-ақ, ұлттық тәрбие мен ұрпақ сабақтастығын кеңінен насихаттауға арналды.
Форумға облыс әкімінің орынбасары Мейрамбек Шермағанбет, қоғам белсенділері, ардагерлер, ата-аналар, жастар және әкелер кеңесінің мүшелері қатысты. Жиынды «Әкелер одағы» республикалық қоғамдық бірлестігі облыс бойынша филиалының төрағасы, облыстық мәслихат депутаты Ержан Ескендір жүргізіп отырды.
Іс-шарада облыс әкімінің орынбасары мемлекет тарапынан отбасы институтын қолдауға бағытталған жүйелі жұмыстар жөнінде баяндап, әкенің отбасындағы орны мен қоғамдағы жауапкершілігіне айрықша тоқталды.
– Халқымызда «Әкеге қарап ұл өсер, шешеге қарап қыз өсер», «Жақсы әке – балаға қырық жыл азық» деген аталы сөздер тегін айтылмаған. Бұл – әкенің тек отбасының ғана емес, тұтас ұлттың рухани тірегіне айналатынын дәлелдейтін өмірлік қағидалар. Әке ол – жауапкершіліктің, табандылықтың, ерліктің, сабырлылықтың символы. Әке тәрбиесі – ел болашағының іргетасы.
Мемлекет басшысы Қасым-Жомарт Кемелұлы: «Берекелі әрі бақытты отбасы – қуатты елдің тірегі. Отбасындағы тәрбие – елдің ертеңге деген сенімді қадамы» деген болатын.
Президентіміздің бұл тұжырымдары бүгінгі форумның маңызымен үйлесіп, отбасының беріктігі мен ұрпақ тәрбиесінің сапасы – мемлекеттің кемел келешегін айқындайтын шешуші фактор екенін айқын аңғартады. Өйткені бақытты отбасы – тұрақты қоғамның, ал тұрақты қоғам – қуатты мемлекеттің негізі. Бүгінде өңірімізде аймақ басшысы Нұрлыбек Машбекұлының бастамасымен отбасы институтын нығайту, жас ұрпақтың рухани-адамгершілік санасын арттыру, ұлттық тәрбие құндылықтарын кеңінен насихаттау бағытында жүйелі жұмыстар жүргізілуде. Кейінгі үш жылдағы мәдениет пен руханият саласындағы серпінді жобалар – өскелең ұрпақтың саналы азамат болып қалыптасуына бағытталған маңызды бастамалар.
Аймағымызда бірқатар мәдени-ағартушылық орталықтардың ашылуы, жастардың бос уақытын тиімді ұйымдастыруға арналған коворкинг алаңдары мен шығармашылық орталықтарының құрылуы – ұрпақ тәрбиесіне жасалған ұзақ мерзімді инвестиция.
Ардақты әкелер! Халық даналығында «Әкенің берген тәрбиесін жүз мектеп бере алмайды» деген терең мағыналы тәмсіл бар. Осыны негізге ала отырып, «Адал адам», «Заң мен тәртіп», «Таза Қазақстан» сынды елдік ұстанымдар мен мемлекеттік идеологияны қоғамда орнықтыру – Сіз бен біздің, асыл әкелер қауымдастығының абыройлы міндеті, ұрпақ алдындағы зор жауапкершілігі әрі айрықша мәртебесі деп білемін, – деді М.Шермағанбет.
Форум аясында еліміздің мақтанышы, бокстан Әлем чемпионатының қола жүлдегері, Азия чемпионатының алтын жүлдегері Тұрсынбай Құлахметтің әкесі Молдахмет Байменов өз өмірлік тәжірибесі мен отбасылық өнегесі туралы ой бөлісті. Сонымен қатар «Сыр медиа» ЖШС бас директоры Марат Аралбаев ұрпақ тәрбиесіндегі өмірлік тәжірибе мен әке өнегесінің маңызын кеңінен тарқатып, жас буынды ұлттық құндылықтарға, еңбекқорлық пен жауапкершілікке баулуда әкелер институтының орны бөлек екенін жеткізді. Ал дін істері басқармасы дін мәселелерін зерттеу орталығының оңалту және киберқадағалау жұмыстарын ұйымдастыру бөлімінің аға маманы, теолог Бақтияр Оспанов өз сөзінде қазіргі жастар арасында дін саласындағы ақпараттық қауіпсіздік пен оңалту шараларының маңыздылығына тоқталып, заманауи сананы қалыптастырудағы әкенің рөлі мен отбасы тәрбиесінің әсерін ерекше атап өтті.
Жиын барысында қатысушылар ұсыныс-пікірлерін айтып, әкелер қозғалысын дамыту, тәрбиелік бағыттағы жобаларды жүйелі түрде іске асыру, сондай-ақ жас отбасылармен жұмысты күшейту мәселелері кеңінен талқыланды.
Форумда отбасылық тәрбие мен қоғамдық келісімді нығайту жолында үлес қосып жүрген азаматтар марапатталды.
Айнұр БАТТАЛОВА,
«Сыр бойы»
