Төреғали Төреәлі Алматы облысының Көлсай көлдерінде болған жанжал кезінде қабағын жарған жігітпен татуласты, деп хабарлайды ҚазАқпарат тілшісі.
«Адамзаттың тарихы тыйым еткен жемісті жеймін деп қателесіп, артынша бірден тәубесіне келген Адам атаның тарихынан басталмай ма? Біз де сол ашуланса да, шаттанса да, соңы немен бітерін болжай алмайтын, пайда, зиянды өлшей алмай қалатын пенденің біріміз. Сахнадан көрген адамын періштедей пәк санайтын қазақ халқының таза пейілі ғой. Ал, сол сахнадағы адамның пенделік кем-кетігін көрсе, қалған көңілі қатқан мұздай болатыны да баладай аңғалдығы емес пе? Халықтың көз алдында жүрген адам болғандықтан әр әрекетіміз көпшіліктің назарында болып тұр ғой. Әйтпесе, қай ер азамат шекіспей жатыр? Кімнің аузынан эмоцияға берілген артық сөз шықпай жатыр? Қай қуыста кім төбелеспей жатыр? Орыстар келіп қалды деп пәтерді қымбаттатып, қаракөз қазақтарды қуып, пайда таппақшы болған арам пиғылдар секілді осы төбелесті де іске жаратып, рейтингімізді көтеріп алайық деген ниеттілердің де аз болмай тұрғандығы да өкінішті. «Адамның күнәсін айта бермеңдер. Күнәсін көргенмен тәубесін көрген жоқсыңдар» демекші, сіз бен біз сөз етіп жүрген біреудің айыбы Алланың алдында әлдеқашан кешіріліп кетуі мүмкін. «Ер шекіспей, бекіспейді» деп Бекарыс бауырымызбен мәмілеге келдік. Қарапайым адамға да, өнер адамына да ортақ республикамыздың заңымен құзырлы органдардың тексерісінен өтіп, ресми бітімге келдік. Сүрінгенде сүйеу болған, түңілгенде тіреу болған алаш жұртына көп рахмет! Қызық болғанда, бүгін Бекарыс бауырымыздың дүниеге келген күні екен. Ғұмырың ұзақ, өмірің берекелі болсын інім! Бір басың екеу болып, адал жар некең болып, Келінді анаң көріп, тойыңды әкең көріп. Әке болып ақ әжеңе шөбере әкел беріп. Сол тойда мен жүрейін бұйырса көкең болып»,- деп жазған әнші Төреғали Төрәлі өзінің Instagram желісіндегі парақшасында.
Естеріңізге сала кетейік, әлеуметтік желіде белгісіз жігіт Төреғали Төреәлінің оның қабағын жарып, жұдырықтағанын жеткізгенін хабарладық.
Төреғали Төреәлі 10 млн теңге кепілдікпен бостандыққа шықаннын хабарлаған болатынбыз.
Осы жайттан кейін күдікті деп танылған әнші Төреғали Төреәлі уақытша ұстау изоляторына қамауға алынды . Оған қатысты қылмыстық кодекстің 293 – бабы «бұзақылық» бойынша тергеу жүріп жатыр. Істі Кеген ауданының полициясы жүргізуде.
>>> Біздің Facebook, Instagram парақшаларымыз бен Telegram каналымызға жазылыңыз! <<<
