Сахавадин Тұрлығұловтың жүргізуші ретінде 20 жылға жуық тәжірибесі бар. Соның кейінгі екі жылында «Қызылорда автобус» ЖШС паркінде жұмыс істеп келеді. Жауапкершіліктен қашпай, тиянақты болғаны үшін жуырда басшылық бригадирлік қызметке қойған. Таңғы сағат 5-те рульге отырғаннан, түн жарымына дейін бел жазбайды. Қиын болғанымен, ол еңбек етуден қашқан емес.
Қалада күніне 280 автобус халыққа қызмет көрсетеді. Олар бірнеше мың адамды діттеген жеріне жеткізеді. Бірақ көпшілікпен түсінісіп, жұмыс істеу оңай шаруа емес. Сабыр мен кәсібилікті қажет етеді.
– Мен №1 бағытты автобусты тізгіндеймін. Сонымен қатар осы бағытқа жауапты бригадирмін. Екі кезекшілікте әрқайсысында 12 жүргізушіден бар. Олардың реттілікпен жұмысқа қосылатын күндерін белгілеп, қарап отырамын. Өзім де автобус жүргіземін. Бригадир болғаныммен, мен де жүргізушілер секілді жұмыс істеймін. Әрине, бізде жұмыс күні ерте басталады. Үйден таңғы төрт жарымда шығамын. Автобусты жолға дайындаймын. Ең алдымен диспетчерге куәлігімізді көрсетіп, жол парағын алғаннан кейін медициналық бақылаудан өтеміз. Дәрігерлер жүргізушілердің қан қысымын өлшейді. Сондай-ақ ішімдік ішпегеніңді анықтайды. Келесі кезекте механик мамандары автобустың техникалық жағдайына назар аударады. Жүруге жарамдылығы анықталғаннан кейін автобустың тазалығына мән беріледі. Оның ішкі тазалығына да өзіміз жауаптымыз, – дейді ол.
Біз автобус жүргізушісінің күнделікті жұмыс ырғағына көз салып көрдік. Жолаушылар тасымалы үлкен жауапкершілікті қажет етеді. Бір күнде 4-4,5 айналым жасап, 400-450 жолаушыға қызмет көрсетеді. Сахавадин жүргізетін №1 бағытты автобус «Қызылжарма» ауылынан шығып, сол жағалау арқылы теміржол вокзалына қатынайды. Сол аралыққа бір жарым сағат уақыт жұмсайды.
– Жүргізушілерге үлкен жауапкершілік жүктелген. Қаншама адам болса, олардың түрлі мінезі бар. Кейбірі үйінен әлденеге ашуланып шығады. Көңіл-күйі болмай отырғанын байқайсың. Тіпті автобуста қасында отырған адаммен сөзге келіп жатады. Оларды сабырға келтіріп, межелі жеріне жеткенге дейін тәртіп сақтауға шақырамыз. Әр жолаушының баратын жеріне аман-сау жетуіне жауаптымыз.
Бізде қызметкерлер мен жұмысшыларға жақсы жағай жасалған. Жаз айларында санаториялық демалыс орнына жолдама беріледі. Түрлі мерекелерде ұжымда іс-шаралар өтеді. Басшымыз Әбдібәкір Ибрагимұлы ұжымның ұйытқысы болып, әрбіріміздің ұсыныс-пікірімізге құлақ түреді, – дейді бізбен әңгімесінде.
Жұмыс барысында міндетін жоғары деңгейде атқаруға мән беріп жүрген Сахавадин Мансұрұлы секілді мамандар аз емес. Тәулік бойына халыққа қалтқысыз қызмет жасауды абыройлы міндет санайтын еңбек адамдары қандай құрметке де лайық.
Айсәуле ҚАРАПАЕВА,
«Сыр бойы»
