98 жастағы соғыс ардагері Леонид Подколзин өзінің өлеңдерін кітап етіп шығармақшы.
Алматы қаласының Наурызбай ауданында тұратын Екінші дүниежүзілік соғысының ардагері Леонид Никитович Подколзин 98 жаста. 17 жасында майданға аттанған ол Жеңіс күнін Германияда атап өткен еді.
Ардагер сол бір қанды майдан жылдарын естен шығарған емес, міне, 40 жылдан бері ол қолжазбалар мен өлеңдерді мұқият сақтап келеді. Ардагердің ең үлкен арманы – кітап шығару, сол арқылы болашақ ұрпаққа мұра қалдыру.
Наурызбай ауданы әкімінің орынбасары Мирас Нысанәлиев атап өткендей, қазір еріктілер ардагер жазған 300-ден астам қолжазбаны баспа форматына әзірлеп, баспаханамен кітапты шығару жөнінде келісім жасап жатыр.
Еріктілер ардагерге «Таза Қазақстан» республикалық экологиялық акциясының «Өнегелі ұрпақ» апталығы, сондай – ақ «Алматы-біздің ортақ үйіміз» науқаны аясында үйін тазартуға көмектесті.
«Біз аудандағы жалғыз ардагерімізге бардық. «Жақыныңа жәрдемдес» акциясы аясында ауданда зейнеткерлер, мүмкіндігі шектеулі жандар, еңбек ардагерлері тұратын 102 үй таңдалды. Еріктілермен бірге біз оларға қажетті көмектің барлығын көрсетеміз. Сонымен қатар, аз қамтылғандарға азық-түлік себеттерін әкелеміз», – деді Наурызбай ауданы әкімінің орынбасары.
Оның айтуынша, жәрдемдесу тек бір реттік акция емес, белсенділер аудан ақсақалдарына үнемі қолдау көрсетіп келеді. Жалғызбасты, аз қамтылған зейнеткерлерге, соғыс және еңбек ардагерлеріне «Алматы – біздің ортақ үйіміз» науқаны аяқталғаннан кейін де жәрдемдесу жалғасатын болады әрі осы шараны іске асыруға бірнеше еріктілер бекітілген.
Естеріңізге сала кетейік, 8 сәуір мен 8 мамыр аралығында қалада «Алматы-біздің ортақ үйіміз» науқаны өтіп жатыр. Әрбір тұрғын қаланың дамуы мен тазаруына үлес қоса алады.
>>> Біздің Facebook, Instagram парақшаларымыз бен Telegram каналымызға жазылыңыз! <<<
