Фото: ашық дереккөз
Антарктикадағы теңіз мұзының көлемі тарихтағы минимум деңгейге жетті, деп хабарлайды ҚазАқпарат БҰҰ жаңалықтар орталығына сілтеме жасап.
Дүниежүзілік метеорологиялық ұйымның (ДМҰ) хабарлауынша, жаһандық деңгейде осымен бесінші жыл қатарынан ақпан айы өте жылы болды. Экстремалды температура және жауын-шашын көп болды, ал Еуропада екінші ең жылы қыс тіркелді.
Теңіз мұзы жаһандық, аймақтық және жергілікті ауа райына үлкен әсер етеді. Бұл Дүниежүзілік метеорологиялық ұйымның жаһандық климаттың жай-күйі туралы есебіндегі негізгі климаттық көрсеткіш. Теңіз мұз аймағының өзгеруі экожүйелер мен қоғам үшін ауыр зардапқа әкелуі мүмкін.
Арктиканың жылынуы орташа жаһандық жылынудан екі есе жылдам жүруде. Нәтижесінде арктикалық теңіз мұзы 45 жылдық спутниктік бақылау барысында күрт төмендеді. Бақылау тарихында ақпандағы қыстың соңғы аязында теңіз мұзының ауданы рекордтық деңгейде төмендеді.
Қаңтар мен ақпанда антарктикалық теңіз мұзы көлемінің төмендеуі рекордтық деңгейге жетті.
Ақпанның аяғында мұз 1,83 миллион шаршы шақырымды құрады. Бұл 2022 жылдың ақпанында тіркелген рекордтық ең төменгі деңгейден 93000 шаршы шақырымға төмен.
Өткен жылы Антарктидадағы теңіз мұзының ауданы жалпы алғанда төмен болды. Ал жаңа мұз әдеттегіден жұқа әрі сынғыш келді. Сонымен қатар, Антарктика түбегі (Оңтүстік Америкаға жақын солтүстік-батыс шеті) планетаның ең жылдам жылынатын аймақтарының бірі – соңғы 50 жыл ішінде шамамен 3°C.
Еске салсақ, бұған дейін Антарктидадағы Брант шельфтік мұздығынан көлемі Үлкен Лондонмен бірдей айсберг бөлінгені туралы хабарлаған едік.
>>> Біздің Facebook, Instagram парақшаларымыз бен Telegram каналымызға жазылыңыз! <<<
