Қазір қауіп аяқ астында, әсіресе, елімізде жол-көлік оқиғасы ең қиын әрі күрделі мәселеге айналып барады. 16 қараша күні Қармақшы ауданы Ақжар ауылының маңында, «Самара-Шымкент» тасжолында екі жолаушылар автобусы соқтығысып, оқиға салдары жұртшылықты әбігерге салды.
«Қазалы-Қызылорда» және «Қызылорда-Қармақшы» бағытындағы екі автобуста 86 жолаушы болған. Жол-көлік оқиғасынан кейін жедел түрде 74 адамға медициналық көмек көрсетіліп, апат орнына Қармақшы ауданының әкімі Сұлтан Мақашов пен аудан әкімдігінің қызметкерлері, облыстық денсаулық сақтау, жұмылдыру дайындығы басқармалары мен жергілікті полиция қызметінің, сондай-ақ төтенше жағдайлар және ішкі істер департаментінің басшылары барған. Сенбі күні осы мәселеге байланысты өңірлік коммуникациялар қызметінде сала басшылары баспасөз конференциясын өткізді.
– Жолаушылардың басым көпшілігі – Қазалы және Қармақшы ауданының тұрғындары. Хабарлама түскен бойда жедел түрде көмек көрсету жұмыстары жүргізілгенімен, екі адам оқиға орнында жан тапсырды. Екеуі де Қармақшы ауданының 1964, 1997 жылғы тұрғындары. Ал ауыр жарақат салдарынан 2011 жылғы жасөспірім ауруханада дүниеден өтті, – деді облыстық жұмылдыру дайындығы басқармасы басшысының орынбасары Ғабит Жаңабаев.
Оқиға орнында жолаушыларға жедел көмек көрсету мақсатында жергілікті полиция қызметінің 34 қызметкері, 13 арнайы техника мен 34 төтенше жағдайлар департаментінің маманы, 130 медицина саласының қызметкері жұмылдырылған. Сондай-ақ, 12 жедел-жәрдем бригадасы жұмыс істеген.
Бүгінде медициналық көмекке жүгінген 74 адамның 30-ы ауруханаға жатқызылған. Оның ішінде 5-і жансақтау бөлімінде болса, 6-на ота жасалған. Сондай-ақ, Қармақшы ауданының ауруханасынан санитарлық авиация арқылы 3 науқас облыстық медицина орталығына ауыстырылды. Зардап шеккен жолаушылар дәрігердің жіті бақылауында болса, қалған 45-не алғашқы медициналық көмек көрсетіліп, амбулаториялық ем тағайындалған.
Жол-көлік оқиғасының неден болғаны әзірге белгісіз. Облыстық полиция департаменті жергілікті полиция қызметі басқармасының бастығы Бауыржан Ибраевтың айтуынша, аталған төтенше жағдай фактісі бойынша тексеру басталып, қылмыстық іс қозғалған.
«Сыр бойы».
