Алаш зиялысы Ахмет Байтұрсынұлы «халықтың көзі, құлағы һәм тілі» деп анықтама берген баспасөз қай кезде де маңызын жойған емес. Халық пен билік арасындағы алтын көпір рөлін абыроймен атқарып келе жатқан Арал өңірінің айнасы – аудандық «Толқын» газетінің жарыққа шыққанына биыл 95 жыл толып отыр. Мерейтой аясында аудандық мәдениет үйінде рухани мазмұны терең салтанатты мерекелік шара өтті. Оған қатысушылар алдымен газет тарихынан сыр шертетін көрмемен танысты.
Мерекелік кешке аудан әкімі Аманжол Оңғарбаев қатысып, басылымның тарихына тоқталып, ел өміріндегі айрықша рөлін атап өтті.
– Халықтың үні мен құлағы болған үнжария әуелде «Екпінді балықшы» аталып, алғашқы санына филология ғылымдарының докторы, профессор Әуелбек Қоңыратбаев қол қойғаны тарихтан белгілі. Биыл айтулы қаламгердің 120 жылдық мерейтойы қатар тойлануда. Газет қай кезде де өз бағытынан айнымай елдің тәрбие құралына айналды. Атағы жаһанға таныс Аралдың әр перзентін елін сүюге баулып, көптеген сала мақтаныштарын халыққа паш етті. Араға жылдар салып, «Социалистік Арал», артынша «Толқын» болып тулаған басылым талай таланттың екінші тынысын ашты, жас буынды тәрбиелеудің көркем үлгісін көрсетті. Бүгінде ақсақалдық жастың асуына иек артқан аудан шежіресі үлкен-кішінің рухани қолдаушысы бола беретіні анық. Әрдайым осы биіктен көрініп, бейнелі сөзбен әдебиет көгінде жарқырай берсін! – деді аудан басшысы.
Кеш барысында газеттің алғашқы редакторы, профессор Әуелбек Қоңыратбаевтың ұлы, филология ғылымдарының докторы, профессор Тынысбек Әуелбекұлына аудан әкімінің құттықтау хаты табысталып, қазақы дәстүрмен иығына шапан жауып, құрмет көрсетілді. Сонымен бірге жергілікті суретші, Қазақстан Суретшілер одағының мүшесі Берік Бөкешовтің картинасы тарту етілді.
Мұнан соң аудандық «Толқын» газетінің бас редакторы Айдар Сайлауов бастаған шығармашылық ұжымға Қызылорда облысы мен аудан әкімдерінің құттықтау хаттары және естелік сыйлықтары тапсырылды. Мерейтой аясында басылымда ұзақ жыл еңбек етіп, қолтаңбасын қалдырған ардагерлер мен қызметкерлер облыс және аудан әкімдерінің Алғыс хаттарымен марапатталды.
Кеш барысында профессор Тынысбек Қоңыратбаев толғанысқа толы лебізін жеткізді. Ал айтыскер ақын Ержеңіс Әбді «Толқын» газетінің мерейтойына арнау айтып, көрерменнің ыстық ықыласына бөленді. Сондай-ақ «Ақтолқын» би тобының өнері, жас орындаушылардың ән-күйі, №260 мектеп оқушыларының «Қағазға түскен тағдырлар» атты сахналық көрінісі кештің көркін аша түсті. Шара аудан өнерпаздарының мерекелік концертіне ұласты.
Мерейтой аясында «Толқын» газетінің 95 жылдығы мен қазақ әдебиетінің көрнекті өкілі, ғалым, ұстаз Әуелбек Қоңыратбаевтың 120 жылдығына арналған ақындар мүшәйрасы өтті. Ашылу салтанатында аудандық мәдениет және тілдерді дамыту бөлімінің басшысы Бауыржан Махатов құттықтау сөз сөйледі. Мүшәйраға 11 ақын қатысып, шығармаларын оқыды. Сөз маржанын теріп, додаға түскен ақындар арасынан бас жүлде аралдық Дархан Аманжолұлының еншісіне бұйырды. І орынды Қазалы ауданынан келген Ақжол Түменбай иеленсе, ІІ орынның жүлдесі қызылордалық ақындар Аружан Оралбай мен Нұргүл Төлеубайға табысталды. ІІІ орынды Оңталап Жолдасов, Алтынбек Қыстаубаев және Ұлықбек Бекұзақұлы иеленді. Сонымен қатар Зейнолла Шүкіров атындағы арнайы жүлдені шиелілік Бекжан Ержігіт қанжығасына байлады. Жүлделі орын иелеріне қаржылай сыйлықтар мен дипломдар табысталды.
Мерейтой бұқаралық ақпарат құралдары өкілдері арасында ұйымдастырылған шағын футболдан облыстық турнирмен айшықталды. Жарыстың ашылу салтанатында аудан әкімінің орынбасары Нұрмұхамет Бохаев, «Сыр медиа» ЖШС бас директоры Марат Аралбаев турнир қатысушыларына сәттілік тіледі. Тартысты доп додасына 5 команда қатысып, қорытындысында жүлделі І орынды «Сыр медиа» командасы иеленсе, ІІ орын «Меншікті тілшілер» командасына бұйырды. Ал ІІІ орынға «Қызылорда-2» командасы лайық деп танылды. Ойынға белсене қатысқаны үшін «Толқын 95», «Қызылорда-1» командалары ынталандыру сыйлығына ие болды. Ойын барысында жеке шеберлігімен көзге түскен ойыншыларға, атап айтқанда, «Сыр медиа» командасының қақпашысы Абзал Жолтерекке «Үздік қақпашы», «Қызылорда-1» командасының шабуылдаушысы Нұржан Батыршаевқа «Үздік сұрмерген», «Сыр медиа» командасының ойыншысы Ерасыл Шәрібекке «Көрермен көзайымы», меншікті тілшілер өкілі Шыңғыс Амангелдіге «Үздік ойыншы» номинациялары табысталды. Жеңімпаз және жүлдегер командалар кубок, медаль, диплом және арнайы сыйлықтармен марапатталды.
Ғасырға жуық уақыттан бері теңіз жағасындағы жұрттың шежіресін тасқа басып келе жатқан басылымның тағы бір белесі артта қалды.
«СБ» ақпарат
