«Келешек мектептері» – Президент Қасым-Жомарт Тоқаевтың бастамасымен іске қосылған ұлттық жоба. Елдегі білім жүйесіне түбегейлі серпіліс әкелген бастама 2022 жылғы Жолдауда көтерілді. Негізгі мақсат – кез келген өңірдегі, кез келген әлеуметтік топтағы балаға сапалы білімді тең қолжетімді ету. Бұған қоса, үш ауысымды оқытуды жою, апатты мектептерді алмастыру, оқушыға орын тапшылығын болдырмау.
Бірыңғай стандарт негізінде салынып жатқан мұндай білім нысаны заманға сай IT-сыныптармен, зертханалармен, шығармашылық және спорт залдарымен, сондай-ақ инклюзивті білім беруге арналған инфрақұрылыммен жабдықталған. Білім мазмұны да жаңарып, оқыту әдістемелері жаңғыртылуда. Мұнда әр бала өз әлеуетін толық аша алады, яғни балада, ауылда да заманауи технологиямен, сапалы біліммен қамтылып, тең дәрежеде дамуға мүмкіндік бар.
Мемлекет басшысы ұсынған ұлттық жоба аясында 217 жаңа форматтағы мектеп құрылысы (2024 жылы – 105, 2025 жылы 112 мектеп) жоспарланған. Бұл – 460 мыңнан астам оқушының болашағын айқындайтын оқу ордалары. Ең кереметі, «Келешек мектептердің» жартысына жуығы ауылдарда салынып жатыр.
Біз білетіндей, Арал қаласы мен Сексеуіл кентінде бой көтерген №292 және №294 «Келешек мектептері» – шын мәнінде болашаққа салынған берік көпір. 300 орындық заманауи талапқа сай келетін сәулетті ғимараттардың іші өте кең, сыныптары жап-жарық. Жаңа мектептер зертханалық кабинеттерімен және жаңа технологиялық жабдықтарымен де ерекшеленеді.
– Бұл мектептерде әр бала өз арманын айқындап, білім көкжиегін кеңейтуге толық мүмкіндік алуда. Ең бастысы, осы игілікті жобаның нәтижесінде ауданымыздағы үш ауысымдық оқу мәселесі түбегейлі шешімін тапты. Бұл – ата-аналарға қуаныш, ұстазға жеңілдік, шәкірттерімізді сапалы білімге бастайтын даңғыл жол, – дейді Арал аудандық білім бөлімінің басшысы Санира Жанназарова.
Басшының сөзінше, мұндай қуанышқа ауылдар да кенелген. Ұлттық жоба аясында салынған мектептерден бөлек, шалғай елді мекендерде жаңа білім ордалары бой көтерді. Айталық, ауданға қарасты Ақшатау ауылында көп жылдан бері ескі әрі тар ғимаратта оқып келген оқушылар су жаңа мектеп табалдырығын аттады. Құны 250 млн теңге болатын 60 оқушыға арналған мектеп демеушілердің қолдауымен салынған. Енді ақшатаулық балалар кең, жарық сыныптарда алаңсыз білім алып жүр.
– Тоқабай елді мекенінде де көптен күткен қуанышты сәт туды. Мұнда 100 орындық жаңа №248 орта мектебі пайдалануға берілді. Жаңа нысан тек сәулетімен ғана емес, толық қамтылған материалдық-техникалық базасымен де ерекшеленеді. Балаларға керек құрал-жабдықтың барлығы жеткілікті. Мектеп ауылда білім берудің қаладағы оқыту сапасымен бірдей болуына мүмкіндік беріп отыр. Одан бөлек, ғасырдан астам тарихы бар №14 мектептің бастауыш сыныптары орналасқан ғимараты да күрделі жөндеуден өтті, – дейді Санира Нұрқожақызы.
Аралдағы білім саласындағы құрылыс өз жемісін беруде. Бұған дейін №№62, 19, 262, 263 және 177 мектептер ағымдағы жөндеуден өтіп, жаңаша кейіпке енген. Үнемделген қаржыны тиімді пайдаланудың арқасында олардың шатыры жаңартылып, қабырғалары әрленген, терезелері ауыстырылыпты. Жарық сынып, жылы дәліз бен қауіпсіз орта аралдық оқушыларға жасалған үлкен қамқорлықтың көрінісіндей.
– Мұндай жұмыстар тоқтап қалмайды. Жақында шалғайдағы Мергенсай ауылында 100 орындық жаңа мектебін пайдалануға беру жоспарланып отыр. Бұл аудандағы білім беру жүйесінің тұрақты дамуының жалғасып келе жатқанын айқын аңғартады. Жаңа мектептер – жаңа мүмкіндіктер мекені. Осындай білім ордаларынан түлеп ұшқан шәкірттер ертең ел тізгінін ұстайтын, ұлт үмітін арқалайтын азамат болып қалыптасары сөзсіз, – деп сөзін қорытты бөлім басшысы.
Білім – ел болашағының мәңгілік шамы. Биыл Аралдан бөлек, жалпы Сыр өңірінде көптеген білім ордалары ел игілігіне берілді. Бұл – тек жаңа ғимараттардың ашылуы ғана емес, мыңдаған баланың үмітін оятқан, ертеңге деген сенімді күшейткен тарихи қадам.
Ержан ҚОЖАС,
«Сыр бойы».
Арал ауданы
