Мемлекет басшысы Қасым-Жомарт Тоқаевтың халыққа арнаған Жолдауында бес жыл ішінде халықты 100 пайыз таза ауызсумен қамтамасыз ету жөнінде нақты тапсырма берілді.
Осы ретте Арал ауданында әлеуметтік инфрақұрылымды дамыту бағытында жүйелі жұмыс жүргізілуде. Құрылыс саласында, халықты сапалы ауызсумен қамтуда айтарлықтай жетістік бар. Кезең-кезеңімен жүзеге асып жатқан түрлі жобалар биыл да жалғасын тапты. Қарқын алған істің қатарында шалғайда орналасқан елді мекендерге таза ауызсу қосу бар. Бұл туралы аудандық құрылыс, сәулет және қала құрылысы бөлімі басшысының міндетін атқарушы Қуанар Әбекенов айтып берді.
– Алыс жатқан ауылдарға да ауызсу тартылып, ел игілігін көруде. Сондай-ақ «Қазсушар» республикалық мемлекеттік кәсіпорнының «Сыр суы» филиалына қарасты «Арал – Сарыбұлақ топтық су құбыры» өндірістік бөлімшесі арқылы 43 насос стансасы, 28 су ұңғымасы, жалпы ұзындығы 1577,3 шақырым су құбыры желілері жұмыс істейді. Оның 739,7 шақырымы – магистральдық су құбырлары, ал 837,692 шақырымы – ішкі су тарату желілері, – дейді ол.
Магистральдық су құбырлары бойынша 1590, ал ішкі тарату желілері бойынша 4405 бақылау құдығы бар. Бұл жүйе арқылы Арал ауданының 43, (оның ішінде Арал қаласы да бар) және Қазалы ауданының 22 елді мекені қамтылып, жалпы 165 мыңға жуық тұрғын таза ауызсуды пайдалануда.
Жағымды жаңалықтың бірі – Ақбасты таза ауызсуға қосылды. Су ресурстары және ирригация министрлігінің Су шаруашылығы комитеті 2,1 млрд теңге және мемлекетке қайтарылған активтер есебінен 524 млн теңге бөліп, аталған елді мекенге 117 шақырым магистральді және 5,2 шақырым ішкі ауызсу желісі жүргізілді. Осылайша ауылға таза ауызсу жетіп, халықтың қуанышы еселенді. Бұған дейін тұрғындар ауызсуды жерасты құдығынан тасымалдап, тұтынып келді. Енді қиыншылық артта қалып, ауызсу әрбір тұрғын үйге жеткізілді.
Ауданнын 94 шақырым қашықта орналасқан Тастүбек елді мекеніне де 30 шақырым су желісі тартылып, су айдау стансасының құрылысы толығымен аяқталды. Қазіргі таңда ауылға ауызсу беріліп, нысан қабылданған.
Бұдан бөлек, 87 шақырым шалғайдағы Ерімбетжаға елді мекеніне 27,3 шақырым су желісі тартылып, су айдау стансасының құрылысы толығымен аяқталды. Қазіргі таңда елді мекенге ауызсу беріліп, тұрғындар дән риза.
Сондай-ақ Абай және Тоқабай елді мекендерін орталықтандырылған ауызсу жүйесіне қосу жұмысы да белсенді жүргізілуде. Оған 8,2 млрд теңге, мемлекетке қайтарылған активтер есебінен 3,6 млрд теңге қаржы бөлінді. Тоқабай ауылына да ауызсу толық берілді. Абай елді мекеніне 32,9 шақырым ауызсу желісі тартылып, су айдау насос стансасының құрылысы аяқталуға жақын.
Бөлім басшысының міндетін атқарушы Қуанар Әбекеновтің айтуынша, жоғарыда аталған жобалар толық іске асырылып, құрылыс-монтаждау жұмысы мерзімінде аяқталғанда, ауданда барлық елді мекен 100 пайыз орталықтандырылған таза ауызсумен қамтылады. Себебі бұл бағытта жүйелі жұмыс, берекелі іс бар.
Бұл Мемлекет басшысының халықтың өмір сүру сапасын арттыруға бағытталған стратегиялық міндеттерінің бірі ретінде белгіленген тапсырмасының Арал ауданы көлемінде толық орындалуына мүмкіндік береді. Алдағы уақытта да аудан халқының тұрмыс сапасын арттыру бағытындағы жұмыстар жалғасын таба бермек.
Жалпы ауызсудың тартылуы әрбір отбасының тұрмысына, өмір сапасына оң әсер ететіні сөзсіз.
Сара АДАЙБАЕВА,
«Сыр бойы»
