Облыстық ардагерлер кеңесінің алқа мәжілісі өтті. Жиынға облыс әкімінің бірінші орынбасары Данияр Жаналинов, салалық ардагерлер кеңестерінің тұрақты және тексеру комиссияларының төрағалары, ардагерлер қозғалысының белсенділері, ZOOM байланысы арқылы Байқоңыр қалалық және аудандық ардагерлер ұйымдарының алқа мүшелері, БАҚ өкілдері қатысты.
Күн тәртібі бойынша «Жаңа Конституция – тұрақты дамудың негізі» тақырыбы талқыланып, облыстық ардагерлер кеңесінің өткен жылы атқарған жұмыстары мен алдағы міндеттері, осы жылға арналған жұмыс жоспары, тағы басқа мәселелер қаралды. Мәжілісті облыстық ардагерлер кеңесінің төрағасы С.Дүйсенбаев жүргізіп отырды.
Жиында сөз алған облыс әкімінің бірінші орынбасары ардагерлерді қолдау бағытында облыс көлемінде атқарылған жұмыстарға тоқталды.
– Қаладағы қарттар үйі жанындағы мүгедектерге әлеуметтік қызмет көрсету орталығында 50 орындық бөлімшеде, Талсуат елді мекенінде 150 орындық қарттар мен мүгедектігі бар адамдарға арналған оңалту орталығында тиісті әлеуметтік қызметтер көрсетілуде. Сонымен қатар, қызмет көрсететін мекемелердің материалдық базасын жыл сайын нығайту және қызмет алушыларға қолайлы моральдық-психологиялық жағдай жасай отырып, сауықтыру және әлеуметтік оңалту іс-шаралары қолға алынған.
Облыс орталығында бірнеше жылдан бері «Сыр мейірімі» жобасы жүзеге асырылып келеді. Бұл жобаға облыстық бюджеттен қаржы бөлініп, көмекке мұқтаж 225 жалғызбасты қарт пен мүгедек, аз қамтылған отбасылар түскі аспен қамтылған. Сондай-ақ жергілікті атқарушы органдар мен жекелеген санаттағы әлеуметтік қолдауды қажет ететін 13646 адамға әлеуметтік төлемдер төленіп, қолдау көрсетілді.
Өткен жылы облыс әкімінің қолдауымен, Жеңістің 80 жылдығына орай Ұлы Отан соғысының қатысушыларына 1,5 млн теңгеден бірреттік төлем берілді. Бұдан бөлек, 2024 жылы демеушілер есебінен 130-дан астам ардагерге демалыс орындарына баруына қолдау көрсетілген болатын, – деді Д.Жаналинов.
Ардагерлер ұйымы – еліміздегі үлкен саяси күштердің бірі. Бүгінде оның құрамында әр салада қызмет еткен 2,5 млн-нан астам зейнеткер бар. Осы орайда облыстық ардагерлер кеңесінің төрағасы Серік Әбішұлы аға буын өкілдері әрдайым Президент бастамаларына қолдау білдіріп, халықтың бірлігін сақтап, қоғамның тұтастығын қалыптастыруға игі ықпал етіп отырғанын атап өтті.
– Мемлекет басшысы «Ардагерлер ұйымы – Үкімет пен халықтың арасын байланыстыратын звенолардың бірі» деген болатын. Осы ретте, қарапайым халық пен билік арасында алтын көпір болып, түйткілді проблемаларды шешуде зор үлес қосып отырған ардагерлер кеңесінің азаматтық қоғам секторында алатын орны ерекше екенін айтып өткеніміз жөн.
Биылғы жылдың басты жаңалығы, санаулы күндерден кейін елімізде мемлекетіміздің жаңа Коституциясын қабылдау жөнінде референдум өтеді.
Алдын ала халықтың талқысына ұсынылған Ата Заңымызда «Ұлы Дала», «Әділетті Қазақстан» және «Құқықтық тәртіп» ұғымдары негізгі қағидаттарды анықтайды. Қоғамның бүгінгі талабына сай жаңа Конституцияны қабылдау елдің болашағына тікелей әсер етеді және мемлекеттің саяси дамуындағы маңызды кезең болады деп сенеміз.
Саяси маңызы зор, жалпыхалықтық жауапкершілігі жоғары іс-шараға аймақ ардагерлері ұйымшылдықпен атсалысады, – деді С.Дүйсенбаев.
Алқада «Жаңа Конституция – тұрақты дамудың негізі» тақырыбында облыстық ардагерлер кеңесінің алқа мүшесі Бақыт Нұртазаев баяндама жасады. Талқыланған басты тақырыпқа байланысты ауыл шаруашылығы саласы ардагерлері кеңесінің төрағасы Нұрлыбай Ұлықпанұлы, облыстық ардагерлер кеңесінің пленум мүшесі Бекмырза Еламанов, облыстық ішкі істер саласы ардагерлер кеңесінің төрағасы Әмірбек Шаймағамбетов пікірлерін айтып, жаңа Конституцияда адам құқығы мен бостандығы, «Заң мен тәртіп» қағидатына негізделген ережелер ел болашағына кепіл болатынына сенім білдірді. Сонымен қатар, өз салалары бойынша өткен жылы атқарылған жұмыстарды саралай келіп, күрмеулі мәселелерді де ортаға салды.
«Облыстық ардагерлер кеңесінің 2025 жылы атқарған жұмыстары мен алдағы міндеттері» бойынша баяндама жасаған облыстық ардагерлер кеңесінің төраға орынбасары Жұмабек Әлиев аймақ ардагерлерінің қатысуымен жыл бойы атқарылған қоғамдық бастамалар, мәдени-көпшілік жұмыстарды назарға ұсынды.
– Өздеріңіз білесіздер, облыстық ардагерлер кеңесі аймақта саяси тұрақтылықты сақтауды, қарттардың әлеуметтік құқықтары мен мүдделерін қорғауды, жағдайы төмен қариялардың әлеуметтік-тұрмыс тіршілігіне қол ұшын беруді, денсаулығы нашар кісілерге барып хал-ақуалын білуді парыз санап келеді. Бұрыннан қалыптасқан жұмыс бағытынан таймай, жасампаз тірлікке ұйытқы болып, жақсы істерге куә, іргелі жобаларға қолдау көрсетуде.
Бүгінде облыс бойынша 85 мыңнан аса зейнеткеріміз бар. Оның 68 017-сі нақты тіркелген. Олар 2 қалалық және 7 аудандық ардагерлер ұйымына біріктірілген 773 бастауыш ардагерлер ұйымында есепте тұр. Оның ішінде, көмекке зәру қарттарымыздың өмір сүру деңгейін көтеру мақсатында облыс бойынша 151 ардагер анықталып, оларға тұрғын үйін жөндеу, қаржылай көмек көрсету, азық-түлік тарату сияқты, басқа да әлеуметтік көмектер берілуде. Бұл игілікті істер жергілікті кәсіпкерлер мен шаруашылықтардың қолдауымен жүзеге асырылуда.
Ұрпақ тәрбиелеу ісінде аналар мен әжелер институтының қоғамдағы мәртебесін арттыру мақсатында ұйымдастырылған «Аялы әже» форумы көпшіліктің жоғары бағасына ие болды. Аталған форумға өзге өңірлерден ардагерлер кеңесінің төрағалары арнайы қонақ ретінде шақырылды. Сыр өңірі әжелерінің ұлттық тәрбие мен отбасылық құндылықтарды дәріптеудегі тағылымды тәжірибесі, өнегелі істері насихатталды.
Тағы бір игілікті іс, ардагерлеріміз жаңарған Түркістан шаһарына саяхаттап, Ұлы ақын Абай еліне, Жидебай жеріне зиярат етіп, барып қайтты. Осы орайда қолдау көрсеткен облыс әкіміне, облыстық ардагерлер кеңесіне алғыс білдірді. Сондай-ақ қараша айында облыс әкімі Нұрлыбек Машбекұлының тікелей қолдауының арқасында біздің аймақта еліміздегі барлық ардагерлер ұйымының басқосуы, республикалық семинар кеңесі жоғары дәрежеде өткеніне ерекше тоқталғым келеді, – деді Жұмабек Әлиев.
Баяндама төңірегінде облыстық ардагерлер кеңесінің пленум мүшелері Әбдімәулен Тоқтыбаев, Дәулетбай Барғанаев, Әжелер алқасының төрайымы Рәзия Қалжанова, Шиелі кенті ардагерлер кеңесінің төрағасы Болат Күлімбет сөз сөйледі. Сондай-ақ облыстық ардагерлер кеңесінің тұрақты комиссия төрағалары мен мүшелерін бекіту жайында облыстық ардагерлер кеңесінің жауапты хатшысы Мақсұт Баекеев баяндама жасады.
Алқа мәжілісінің қорытындысымен тиісті қаулы жобалары қабылданды. Сонымен қатар, бірқатар ардагерге мерейтойына орай марапаттар табысталып, сый-құрмет көрсетілді.
Ғазиза ӘБІЛДА,
«Сыр бойы»
