Облыс әкімі Нұрлыбек Нәлібаев, ҚР Парламенті Сенатының депутаты Наурызбай Байқадамов, облыс прокуроры Ризабек Ожаров,зиялы қауым өкілдері мен ардагерлер Қазалы ауданының Әйтеке би кентіндегі теміржол арқылы өтетін аспалы көпірдің ашылу рәсіміне қатысты.
Аймақ басшысы жиналған жұртшылықты құттықтап, жол инфрақұрылымын дамытудағы ауқымды жұмыстарды атап өтті.
– Бурабайда өткен Ұлттық құрылтайда Президентіміз Қасым-Жомарт Кемелұлы: «Жер көлемі жөнінен әлемде тоғызыншы орын алатын еліміздің көлік-транзит саласында зор мүмкіндіктері бар. Бұл – айрықша назар аударуды талап ететін стратегиялық бағыт» деген болатын.
Осы мақсатта өңірімізде белсенді жұмыстар атқарылуда. Мемлекет басшысының, Үкіметтің ерекше қолдауымен 2022-2025 жылдары 1 600 шақырым автомобиль жолы мен көшелерді, 30 көпір өткелін салуға, күрделі жөндеуге 150 млрд теңгеге жуық қаржы бөлінді. Өткен жылдың өзінде жол инфрақұрылымын дамытуға бюджеттен 50 млрд 605 млн теңге қаралып, 329 шақырым автомобиль жолы, көшелер мен көпір өткелдері жөндеуден өтуде.
Қазалы вокзалы жанындағы 1,3 млрд теңгеге салынған теміржол үстінен өтетін аспалы көпір – осындай байыпты бастамалардың жалғасы. Бүгін ел игілігіне табысталатын жаяу жүргіншілерге арналған көпірді Әйтеке би кентінің арғы бетінде тұратын 13 мыңнан астам тұрғын қолданады. Бұл өткел арқылы 2 мыңнан астам адам күнделікті әрлі-берлі қатынайды. Сондықтан да жұртшылықтың теміржолдан қауіпсіз әрі тез өтуіне тигізер пайдасы ұшан-теңіз.
Көпірді сапалы етіп салып, мерзімінде аяқтаған мердігер «ҚазТеміржол Engineering» ЖШС-ның құрылысшыларына алғыс білдіреміз. Қуаныштарыңыз құтты болсын! Жаңа көпір жақсылықтың бастауы болғай, – деді облыс әкімі.
Рәсімде «Құрмет» орденінің иегері, Қазалы ауданының құрметті азаматы Оразғали Бекбанов бата берді. Теміржол саласында еңбек ететін мамандар мен көпір құрылысын салған мердігер мекеме өкілдері облыс әкімінің Алғыс хатымен марапатталды.
Кейінгі жылдары теміржолдан өтетін көлік және жолаушы қозғалысын реттеу мәселесі аспалы көпір салу арқылы шешімін тауып келеді. Халық ұзақ жыл бойы күткен Арал қаласындағы, Жаңақорған кентіндегі теміржол үстінен өтетін көпірлер пайдалануға берілді.
Бүгінде 4 млрд 700 млн теңгеге облыс орталығындағы Жанқожа батыр көшесі арқылы өтетін теміржоласты автожолы құрылысы қарқынды жүруде. Ендігі кезекте сол жағалауға апаратын екінші көпір салу жобасы қолға алынды. Қазір жоба-сметалық құжаттама әзірленуде.
Қармақшы ауданының Жосалы кентінде 5 млрд 515 млн теңгеге теміржол арқылы өтетін көпір құрылысы жақын уақытта басталады.
