Бүгін аудан әкімі Мейрамбек Шермағанбет Рамазан айының алғашқы күнінде аудандағы 101 жастағы ең қарт ақсақал, Ұлы Отан соғысының ардагері Қабақ Смағұл ақсақалдың шаңырағына арнайы барды. Аудан басшысы қос ғасырдың куәсі болған қарияға облыс әкімі Нұрлыбек Нәлібаевтың қасиетті айдың басталуына орай құттықтауы мен сәлемін жеткізді.
Өз кезегінде ғасыр жасаған майдангер қария Ораза айының алғашқы күнінде ауыл халқымен кездесулерін үлкенге құрмет көрсетумен бастаған аудан әкіміне ризашылығын жеткізіп, ел игілігі үшін жасап жатқан қызметтеріне абырой мен табыс тіледі.
Мұнан бөлек Әйтеке би кентінде тұратын халқының қадірлісіне айналған абзал ақсақал Айымқұл Жалғасбайұлыныңда шаңырағына ат басын бұрды. Саналы ғұмырын сауда саласына арнап, ауданның әлеуметтік-экономикалық дамуына өз үлесін қосқан қария бүгінде 95 жасқа толып отыр.
Мейрамбек Зинабдинұлы абзал ақсақалды аймақ басшысы мен аудан халқының атынан мерейтойымен құттықтап, құрмет көрсетті.
Бүгінде талай жылғы еңбегінің зейнетін көріп отырған қария аудан халқының әл-ауқатын жақсарту бағытында атқарылып жатқан жұмыстардың барлығы үшін аймақ басшысы мен барша ел азаматтарына шынайы алғысын білдірді.
Қазалы ауданы әкімдігі
>>> Біздің Facebook, Instagram парақшаларымыз бен Telegram каналымызға жазылыңыз! <<<
