27 ақпан – Дүниежүзілік үкіметтік емес ұйымдар күніне орай «Достық үйінде» «Әділетті Қазақстанның жаңа Конституциялық моделі: қоғамдық бірлестіктер мен жергілікті атқарушы органдардың ынтымақтастығы» тақырыбында салтанатты жиын өтті. Оған облыс әкімінің орынбасары Мейрамбек Шермағанбет, облыстық қоғамдық даму басқармасының басшысы Руслан Каюпов, «Қызылорда облысының Үкіметтік емес ұйымдарының Альянсы» қауымдастығының төрайымы Анар Ізден, ҮЕҰ жетекшілері, қоғам белсенділері, сарапшылар, жастар және БАҚ өкілдері қатысты.
Жиында Мейрамбек Шермағанбет үкіметтік емес ұйым өкілдерін кәсіби мерекемен құттықтап, өңірде азаматтық қоғам институттарының қарқынды дамып келе жатқанын атап өтті.
– Азаматтық қоғам – ел дамуының, демократиялық құрылымдардың және қоғамның әлеуметтік-рухани бірлігінің негізгі тірегі. Оның дамуы елдің тұрақтылығы мен өркендеуі үшін шешуші мәнге ие. Өңірде Мемлекет басшысының тапсырмаларын жүйелі негізде орындау мақсатында нақты іс-шаралар жүзеге асырылуда. Аймақ басшысы Нұрлыбек Машбекұлының бастамасымен барлық аудандарда салынған «Руханият» орталықтарында Үкіметтік емес ұйымдарға, ардагерлер мен аналар кеңестеріне, этномәдени бірлестіктерге, жастар ұйымдарына арнайы жабдықталған кабинеттер беріліп, оларға орталықтың барлық әлеуетін пайдалана отырып азаматтық қоғамның дамуы мен белсенділігін арттыруға бар жағдай жасалды. Қазақстан халқы Ассамблеясының 30 жылдығы аясында 5 қаңтарда пайдалануға берілген біз бас қосып отырған «Достық үйінде» облыстық Азаматтық Альянсқа аймақ басшысының тапсырмасымен қажетті құрал-жабдықтармен толық қамтамтылған арнайы жұмыс кабинеті берілді. Баршаңызды атаулы мерекелермен құттықтай отырып, азаматтық қоғамның дамуына, үкіметтік емес ұйымдардың белсенді жұмыс жасауына, әлеуметтік бастамалардың табысты жүзеге асуына сәттілік тілеймін, – деді Мейрамбек Зинабдинұлы.
Жиында «Ақ босаға» әйелдер ҚБ төрайымы З.Тажиева, «Бастаманы қолдау» ҚБ атқарушы директоры Ж.Сапаржанова, облыстағы «Gamma MMA» федерациясы ҚБ төрағасы Б.Қобланов, «Жас Арал өрендері» ҚБ төрағасы Н.Жорғабаев баяндама жасап, өз тәжірибелерімен бөлісті.
Сондай-ақ шара соңында өңірдің қоғамдық өміріне белсенді үлес қосып жүрген бірқатар үкіметтік емес ұйым өкілдеріне облыстың ең жоғары марапаты Құрмет грамотасы және облыс әкімінің Алғыс хаты берілді.
«СБ» ақпарат
