ҚР Қорғаныс және аэроғарыш өнеркәсібі министрлігіне ведомстволық бағынышты ұйым «Қазтехнологиялар» АҚ Қазақстандағы алғашқы патрон зауытын салады, деп хабарлайды ҚазАқпарат тілшісі.«Осынау ауқымды жобаны іске асырудан тыс, Қарулы Күштерде және басқа да күштік құрылымдарда пайдаланылмайтын оқ-дәрілерді жоюмен, сондай-ақ бұрғылау-жару қызметімен де айналысамыз», – дейді «Қазтехнологиялар» АҚ басқарма төрағасы Талғатбек Айтқожинов.
Оның сөзіне қарағанда, жарамсыз болып қалған оқ-дәрілерді сақтау, бір жағынан, қауіпті, екінші жағынан, артық шығындарды қажет етеді. Қазіргі кезде Жамбыл облысының Отар ауылындағы және Оңтүстік Қазақстан облысының Арыс қаласындағы оқ-дәріні жою учаскелерінде жұмыс жүріп жатыр. Жарамсыз оқ-дәріні жоюға 200-ге жуық жоғары білікті инженер-техникалық маман мен өндірістік жұмысшы жұмылдырылған.
«Жоғары Бас қолбасшы – ҚР Президенті біздің алдымызға аса жауапты міндетті – Қарағанды қаласында патрон зауытын салуды тапсырды. Патрон зауытының іске қосылуы армия және ел өмірі үшін әрі экономикалық, әрі әлеуметтік жағынан да маңызды», – дейді Талғатбек Айтқожинов.
«Steel manufacturing» ЖШС (ҚР ҚАӨМ «Қазтехнологиялар» АҚ-тың еншілес ұйымы) тарапынан іске асырылып жатқан зауыттың құрылысы Қарағанды облысындағы «Сарыарқа» арнаулы экономикалық аймағының аумағында бекітілген график бойынша жүріп жатыр. «Отандық қорғаныс-өнеркәсіп кешенін дамыту мақсатында қызметімізді әртараптандыруда өндіріске, оқ-дәрілерді жаңғырту және жөндеуге, алдыңғы қатарлы технологияларды енгізу арқылы өнеркәсіптік жарылғыш заттарды өндіруге, шетел инвестицияларын жұмылдыру арқылы өз ғылыми базамызды қалыптастыруға басымдық беріп келеміз», – дейді «Қазтехнологиялар» АҚ басшысы.
>>> Біздің Facebook, Instagram парақшаларымыз бен Telegram каналымызға жазылыңыз! <<<
