Қызылордада «Сырдың Сәбирасы-І» халықаралық театрлар фестивалі мәресіне жетті. Өскелең ұрпаққа өнегелі мәні зор өнер шарасы Қызылорда қаласының қазақ елінің астанасы болғанына 100, театрдың құрылғанына 70 жыл толуына орайластырылды.
Өткенге тағзым, ертеңге тағылым ретінде айшықталған фестиваль барысында сахна өнерінің саңлағы Сәбира Майқанованың өнер жолы насихатталып, халықаралық шығармашылық байланысты нығайтуға жол ашылды. Шетелдік және еліміздің өзге өңірлерінен келген театр ұжымдары жергілікті көрерменге ой саларлық толымды туындыларды ұсынды.
Өнер шарасын бағалауға театр өнерінің шетелдік және қазақстандық белгілі тұлғалары шақыртылды. Фестивальде КСРО Халық артисі Асанәлі Әшімов қазылар алқасының төрағасы болса, Ш. Руставели атындағы Грузия мемлекеттік театр және кино университетінің профессоры Лаша Чхартишвили, И.Арабаев атындағы Қырғыз мемлекеттік университетінің жетекші маманы Элеонора Турдубекова, М.Әуезов атындағы Қазақ Мемлекеттік академиялық театрының директоры, өнертану ғылымдарының кандидаты Еркін Жуасбек, Т.Жүргенов атындағы Қазақ ұлттық өнер академиясының профессоры, Қазақстан театр сыншылары бірлестігінің төрайымы Анар Еркебай спектакльдерге лайықты бағасын берді.
Грузиялық Лаша Чхартишвили фестиваль аясында өнер ұжымдары алып келген шығармалармен танысқанын тілге тиек етті. Атап айтқанда, олардың қатарында Дина Жұмабаева, Гауһар Адай, Рана Мақатаеваның еңбектері бар. Бұл мамандар сыншылар тарапынан жоғары бағасын алып үлгерген. Бір аптаға жуық уақытта қызылордалық көрермендер тәрбие мен тағылымы зор туындылармен сусындады.
Фестиваль бағдарламасында Н.Островский, У.Шекспир, Г.Маркес, Ш.Айтматов сынды әлемдік деңгейдегі классиктердің шығармалары көпшілік назарына ұсынылды. Оған қоса қазіргі қазақ драматургиясының үздік шығармалары сахналанды. Әрбір спектакль барысында өнер ұжымдарының шығармашылық ізденісі, тәжірибесі, шеберлігі айқын аңғарылып тұрды.
Қазылар алқасының шешімімен бас жүлде Н.Бекежанов атындағы қазақ академиялық музыкалық драма театры ұсынған Н.Островскийдің «Найзағай» драмасына берілді. Ал Атырау жастар театры алып келген «Хансұлу» перфомансы бірінші орынға лайық деп танылса, Т.Абдумомунов атындағы Қырғыз Ұлттық Академиялық драма театрының «Ай тутулган тундо» драмасы екінші орын алды. Үздік үштікті Грузиядан келген Н.Думбадзе атындағы мемлекеттік кәсіби балалар мен жасөспірімдер театры ұсынған У.Шекспирдің «Гамлет» драмасы түйіндеді.
Фестиваль барысында бірқатар номинация бойынша жеңімпаздар анықталды. Атап айтқанда, Б.Римова атындағы Талдықорған драма театрының «Ана» драмасы «Үздік актерлік ансамбль» номинациясына ие болса, Г.Маркестің «Макондо» драмасын сахналаған С.Қожамқұлов атындағы Жезқазған қазақ музыкалық-драма театры «Ең үздік суретші» номинациясын алды. Сондай-ақ «Ең үздік ер адам бейнесі» номинациясына қостанайлық Қонысбек Бегайдаров, «Ең үздік әйел бейнесіне» Алматы қаласындағы ұйғыр музыкалық комедия театрынан Амина Үсенова лайық деп танылды. Ал Семей қаласындағы Ф.Достоевский атындағы орыс драма театры «Ең үздік пластикалық шешім» номинациясын, Румыниядағы Эльвира Годяну атындағы драма театрынан Попилиу Чоки «Екінші пландағы үздік ер адам бейнесі», Т.Ахтанов атындағы Ақтөбе драма театрының актрисасы Полина Савидская «Екінші пландағы үздік әйел бейнесі» номинациясын иеленді.
«СБ» ақпарат
