Ә.Тәжібаев атындағы облыстық кітапханада жазушы, Қазақстанның еңбек сіңірген қайраткері, халықаралық «Алаш» әдеби сыйлығының лауреаты, І дәрежелі «Барыс» және «Парасат», «Құрмет» ордендерінің иегері, «Бибі-Ана» қайырымдылық қорының президенті Бибігүл Иманғазинаның «Бибі – Сана» кітабының таныстырылымы өтті. Айта кетейік, автордың бұл кітабының орыс, түрік тілдеріндегі аудармасы және нүктелі-бедерлі (Брайл шрифті) басылған нұсқасы жарық көрген.
Қаламгерлікпен қатар қайраткерлігімен қоғамда өз орнын иеленген Бибі – Ананың өнегелі өмірі мен шығармашылығын жастарға таныстыру бағытында ұйымдастырылған жиынды кітапхана директорының орынбасары Айгүл Жанғабылова жүргізді. Ол сөзінің кіріспесінде кітап авторы Бибігүл Иманғазинаның отбасында болып, сұхбаттасу кезінде қаламгердің бойындағы биік парасаты, бірегей болмысы тәнті еткенін атап өтті.
Әдеби-танымдық кешке Қорқыт ата атындағы Қызылорда университетінің аға оқытушысы, филология ғылымдарының кандидаты А.Айтбаева, ақын, журналист, Қазақстан Жазушылар одағының мүшесі Ғ.Әбілда, «Ақмешіт ақшамы» газетінің бас редакторы С.Бихожа, мүгедектерге арналған оңалту орталығының директоры М.Тілеуова, «Ақмешіт апталығы» газетінің тілшісі Г.Қожахметова, сондай-ақ, Қызылорда Ашық университетінің, «Өркениет» медициналық колледжінің оқытушылары мен студенттері қатысты.
Алғашқы сөз кезегін алған филология ғылымдарының кандидаты Айман Ералықызы жарыққа шыққан «Бибі – Сана» кітабының мазмұнын жан-жақты баяндай келіп, «Тауқымет» романынан бастау алған трилогияның түпкі идеясында тағдыр сынынан тауы шағылмай, ағысқа қарсы жүзген кейіпкер арқылы адами қасиеттің биік көрінісі айқындалып тұрғанын атап өтті.
– Автор шығармашылықты тек көңіл-күйдің эстетикалық құбылысы ғана емес, жалпы өмірді қабылдаудағы рухани жауапкершілік алаңы деп түсінді, яғни жазушыны қоғам алдындағы жауапты тұлға деп таныды. Сондықтан да оның шығармаларында адамға жанашырлық, мейірім мен махаббат, намыс пен жігер, ар-ождан мәселелері негізгі идеялық өзекке айналған.
Осынау ғұмырбаяндық романы арқылы қаламгер қоғамдағы мүгедек адамға деген қасаң көзқарасты түбегейлі өзгертіп, олардың сау адамдармен бірдей өмір сүріп, дені сау ұрпақ тәрбиелеп, тіршілік ете алатынын дәлелдеді. Осы қатардағы көмекке мұқтаж көптеген жандарға қол ұшын беріп, өмірден өз орнын табуына ықпал етті.
Оқырманға жол тартқан «Бибі – Сана» кітабы қай деңгейдегі оқырман үшін де тәлім-тәрбиелік мәні жоғары туынды, – дейді ғалым.
Белгілі журналист, «Ақмешіт ақшамы» газетінің бас редакторы С.Бихожа кезінде қалың оқырманды селт еткізіп, жүрегінен орын алған «Тауқымет» романы бір адамның басынан кешкен өмірі болса да, шығарма мазмұнындағы сан қырлы оқиғалар адам жанына қатты әсер етіп, қайшылықты сұрақтардың шешімін табуға жетелейтінін айтты. Бұл орайда жастарды кітап оқуға баулудың маңызды екеніне тоқталды.
Ақын, журналист Ғазиза Әбілда «Тауқымет» романы тоқсаныншы жылдары қазақ әдебиетіне үлкен олжа салып, қалың оқырманның ыстық ықыласына бөленген туынды екенін айтты.
– Біз мектептің жоғары сыныбында оқитын кезіміз. Ол уақытта интернет дұрыс дамымаған, ұялы телефон да жоқ. Бірақ соның өзінде «Тауқымет» романы туралы әңгіме ел ішінде тез тарады. Кітапты бірімізден біріміз алып оқыдық. Шығарма желісіндегі оқиғаға жанымыз ауыра тұрып, басты кейіпкердің батылдығы мен күрескерлігін, адалдығы мен өмірге құштарлығын таныдық. Үлгі тұттық. Шынын айтсақ, романның басты кейіпкері арқылы қазақ қызының табиғи болмысын, танымы мен тағылымын, өмірге деген өзіндік көзқарасы мен биік ұстанымын білгендей болдық.
Тағдыр тауқыметін жеңіп, қоғамнан өз орнын тапқан, бүгінде «Бибі-Ана» қорының президенті Бибігүл Иманғазина қайырымдылық пен ізгілік жолын ұстанған жан. Осынау қор жұмысы арқылы ол еліміздегі мүмкіндігі шектеулі аналардың балаларына қамқорлық жасап, қолдау танытып келеді. Бір сөзбен айтқанда, «Бибі – Сана» кітабы – оқырман үшін қай кезеңде болсын, өзектілігін жоғалтпайтын өмірлік мазмұнды шығарма, – деді ол.
Кеш қонақтары қаламгердің тағдырлы өмір жолы мен шығармашылығына, қазақ оқырманы арасында кең танылған «Тауқымет» романының толықтырылып, өңделген нұсқасы «Бибі – Сана» кітабының мәні мен мазмұнына тоқталып, қалам иесінің адамгершілік ұстанымы мен әдебиеттегі орны туралы өз пікірлерін бөлісті. Сонымен қатар, жас оқырмандар берен болмысты Бибі-Ана туралы жазылған ақын жырларын оқыды. Көпшілік назарына «Тағдырлы Бибі-ана» атты кітап көрмесі ұсынылды.
«СБ» ақпарат
