Білім мен ғылым – кез келген елдің дамуы мен өркендеуінің басты кепілі. Бұл – жай ғана ұран емес, шынайы өмірдің қағидасына айналған ақиқат. Себебі адамзат тарихындағы әрбір өркениетті кезең білім мен ғылымның жетістіктерімен тығыз байланысты.
Кейінгі жылдары елімізде осы бағытта жүйелі қадамдар жасалып жатқанын қуана айтуға болады. Әсіресе, Мемлекет басшысы Қасым-Жомарт Кемелұлы Тоқаевтың білім мен ғылым саласына тұрақты түрде назар аударып, нақты шешімдер қабылдап келе жатқаны болашаққа деген сенімді күшейтеді.
Жуырда ғана Астанада өткен «Қазақстан – академиялық білім аймағы» атты халықаралық стратегиялық серіктестер форумы осының айқын дәлелі. Бұл форум әлемдік деңгейдегі жоғары оқу орындары басшыларын, халықаралық рейтинг агенттіктері өкілдерін, ғылым мен инновация саласының жетекші мамандарын бір алаңда тоғыстырды.
Форум жұмысына Қазақстан Президенті қатысып, білім мен ғылымның адамзат өркениетін алға жылжытатын ең қуатты күш екенін ерекше атап өтті. «Университет – озық ойлар мен жаңа идеялардың ордасы, ал ғалым – қоғамның қозғаушы күші» деді Мемлекет басшысы.
Бұл сөздер тек жоғары оқу орындарына ғана емес, бүкіл қоғамға бағытталған стратегиялық бағдар іспетті.
Шынында да, университет – елдің интеллектуалды әлеуетін қалыптастыратын, жаңа идеялар мен технологиялардың ұясы. Кейінгі жылдары Қазақстанда университеттердің дербестігі кеңейіп, зерттеу бағытындағы оқу орындарының саны артып келеді. «Ғылым және технологиялық саясат туралы» заңның қабылдануы – бұл саладағы реформалардың жаңа кезеңі.
Мемлекет тарапынан қолдау да айқын сезіледі. 2019 жылдан бері білім мен ғылымға бөлінетін қаржы көлемі үш есеге артты. 1200 жаңа мектеп салынды, тағы 150 «Келешек мектебі» бой көтеруде. Бұл – жас ұрпақтың заманауи білім алуына жасалған зор мүмкіндік.
Сонымен қатар, жоғары оқу орындарының инфрақұрылымы жаңарып, жаңа кампустар мен жатақханалар салынуда. Гранттар мен пайызсыз несиелердің көбеюі жоғары білімнің қолжетімділігін арттырып отыр.
Мемлекет басшысының білім мен ғылым саласына қатысты әрбір форум мен кеңеске жеке қатысуы бұл бағыттың еліміздің стратегиялық болашағы үшін шешуші рөл атқаратынын көрсетеді.
Форум барысында біз, жоғары оқу орындарының басшылары, халықаралық серіктестермен тәжірибе алмасып, жаңа ғылыми жобаларды жүзеге асыруға бағытталған бірқатар келісімдерге қол қойдық. Бұл «Болашақ» университеті үшін де маңызды кезең болды. Біз білім беру сапасын халықаралық деңгейге көтеру жолында нақты жоспарлар жасап отырмыз.
Біздің басты мақсатымыз – еңбек нарығының сұранысына сай білікті, заманауи ойлайтын, елжанды маман тәрбиелеу.
Білім мен ғылым – ел болашағының темірқазығы. Сондықтан әр ұстаздың еңбегі, әр зерттеушінің ізденісі, әр студенттің арманы – тәуелсіз еліміздің ертеңіне қосылған үлес.
Бұл форум Қазақстанның әлемдік білім кеңістігіндегі орны нығайып келе жатқанын, ал біздің еліміздің ғылым мен инновацияға негізделген болашағы айқын екенін тағы бір мәрте дәлелдеді.
Г.СНАСАПОВА,
Қызылорда «Болашақ»
университетінің ректоры
