ҚР Ғылым және жоғары білім министрі Саясат Нұрбек биыл елімізде ұлттық бірыңғай тестілеу қалай өтетінін түсіндірді.
«Биыл біз түбегейлі өзгерістер жасамаймыз. Енді ҰБТ тапсырудың бес кезеңі бар. Естеріңізде болса, бұрын бәрі бір күнде өтетін. Осының салдарынан балалар күйзеліске түсетін, үлкен жүктеме болды. Биыл тестілеу бес рет болады, яғни екеуі ақылы түрде ұйымдастырылады. Қаңтар айындағы тестілеуге 130 мыңға жуық адам қатысты. Енді наурыз айындағы тестілеу бар. Екі ақылы тестілеу кезінде бала өз күшін сынап көреді, өзінің әлсіз жақтарын түсінуге мүмкіндігі бар. Екі негізгі тест мамырдан шілдеге дейін созылады және бала тіркелген осы екі кезеңнің ішінде ең жоғары балл арқылы грантқа үміткер бола алады. Тамыз айында бесінші кезең де бар. Бұл ақылы оқуға түсетін немесе тапсыруға үлгермегендерге, сондай-ақ халықаралық университеттердің нәтижесін күтіп жүргендерге арналған. Жалпы, кейінгі кезде ҰБТ-ға қатысты келеңсіз жағдайлар, суицидтер кездесіп жатқан жоқ», – деді С.Нұрбек Парламент Мәжілісінде тілшілер сұрағына жауап бере отырып.
Бұл ретте министр биылғы ҰБТ-да қандай нақты өзгерістер болатынын айтты.
«Осы жылы түбегейлі ештеңені өзгертпейміз, бірақ ұпайлар аздап қайта бөлінді, енді біз негізгі жүктемені негізгі мамандық пәндеріне беріп жатырмыз. Енді талапкер бейіндік пәндер бойынша жоғары балл алады», – деп түсіндірді Саясат Нұрбек.
Айта кетейік, наурыз айында өтетін ҰБТ-ға қатысу үшін өтініш қабылдау 27 ақпанда басталып, 10 наурызға дейін жалғасады. Қаңтар айында 134 мыңға жуық талапкер ҰБТ тапсырды.
>>> Біздің Facebook, Instagram парақшаларымыз бен Telegram каналымызға жазылыңыз! <<<
