Облыста жыл басынан бері өзге адамның телефонындағы банк қосымшасынан онлайн несие рәсімдеген 64 алаяқ ұсталды, деп хабарлайды ҚазАқпарат тілшісі.
Облыстық Полиция департаментінің мәліметтеріне қарағанда, алаяқтар бөтен біреудің жеке деректерін телефон арқылы біліп алады, содан соң олардың атына несие рәсімдейді.
– Алаяқтар смартфон арқылы өзге біреудің банк қосымшасына кіреді. Олардың арасында тіпті электронды цифрлы қолтаңбаны бұза алатындары кездеседі. Биылғы жылдың 3 айында облыс бойынша 64 азамат осындай алаяққа алданған, – деп мәлім етті облыстық полиция департаментінен.
Ведомство мәліметіне қарағанда, осындай оқиғаның бірі Жалағаш ауданында тіркелді. Онда жергілікті тұрғын танысының ұялы телефонын сұрап алып, 495 мың теңге онлайн несие рәсімдеген. Бұл әрекет бойынша ҚР Қылмыстық кодексінің 190-бабының 2-бөлігі 4-тармағы негізінде сотқа дейінгі тергеп-тексеру әрекеттері жүріп жатыр.
Еске салсақ, облыста алаяқтық қылмысы 54,4 пайызға азайды.
