Мемлекет басшысы Қасым-Жомарт Тоқаев 2025 жылды «Жұмысшы мамандықтар жылы» деп жариялағаны белгілі. Бұл бастама қоғамның еңбек адамына құрметін арттырумен қатар, елдің экономикалық дамуын қамтамасыз ететін жұмысшы мамандықтардың маңыздылығын қайта бағалауға үлкен серпін береді.
Алдағы уақытта әлемдегі еңбек нарығы өзгерістерге ұшырап, жаңа талаптар туындайды. Цифрландыру мен автоматтандыру жүйесінің дамуы көптеген салада адам еңбегін алмастыратын жаңа технологиялар мен жүйелерге жол ашады. Бірақ бұл өзгерістердің арасында жұмысшы мамандықтардың маңызы артады.
Атаулы жыл аясында жуырда Қазалы аграрлы-техникалық колледжі «Ветеринария» мамандығының студенттері үшін өңіріміздегі іргелі кәсіпорын – «РЗА-Асыл түлік» ЖШС базасында ашық есік күні ұйымдастырылды. Шараның басты мақсаты – болашақ жас мамандарға өз мамандықтарының маңызын түсіндіріп, теориялық білімдерін нақты өндірістік жағдайда қолдана білуін қамтамасыз ету. Сондай-ақ кәсіби дағды қалыптастыру, жұмысшы мамандығының беделін арттыру.
Қазалы аграрлы-техникалық колледжі өз студенттерін дәл осы өзгерістерге бейімдей отырып, олардың заманауи техникалық дағдылар мен практикалық тәжірибені меңгеруіне жағдай жасайды. Білім орны жұмысшы мамандықтарға жаңаша көзқарас қалыптастыруда жетекші рольге ие. Колледж осы орайда бірнеше бағытта жұмыс атқарып келеді. Оның ішінде материалдық-техникалық базасы қалыптасқан. Оқу шеберханалары мен зертханалар жаңа құрал-жабдықтармен қамтамасыз етілген. Бұл білім алушылардың тәжірибелік дағдыларын дамытуға мүмкіндік береді. Жұмыс берушілермен әріптестік орнаған. Аймақтағы жетекші компаниялармен тығыз байланыс арқылы студенттер сонда өндірістік тәжірибеден өтеді, бұл оларды жұмыспен қамтуға көмектеседі. Түлектерді қолдауға жіті көңіл бөлінеді. Колледжден түлеп шыққан мамандардың жұмысқа орналасу көрсеткіші жоғары. Осылайша олардың мансап жолындағы сәтті қадамына барынша жағдай жасалған.
Өндіріс орнында студенттер кәсіби тәжірибе жинақтап, оқу барысында алынған білімді практикада қолдана білді. Мамандық ерекшеліктерін терең түсініп, нақты жұмыс орнында кәсіби міндеттерді орындау арқылы мамандықтың қыр-сырын үйренді. Жұмыс дағдыларын қалыптастыру арқылы ұйымдастырушылық, коммуникативтік және техникалық дағдыларды дамытуға мүмкіндік алды.
Іс-шараны ұйымдастырудағы тағы бір мақсат – жауапкершілік пен дербестікті арттыру, яғни тапсырмаларды өз бетінше орындау және шешім қабылдау қабілетін дамыту. Болашақ еңбек қызметіне бейімделу кәсіби ортадағы қарым-қатынас пен этиканы меңгеруге мүмкіндік береді.
«СБ» ақпарат
