Санитариялық-эпидемиологиялық бақылау комитеті лагерьлердің жазғы демалысқа дайындығын бақылауға кірісті. Бұл туралы Қазақпарат агенттігі хабарлайды.
Қазіргі уақытта комитеттің аумақтық бөлімшелерінің атына санитариялық-эпидемиологиялық қорытынды (СЭҚ) алуға 29 өтініш келіп түскен. Оның 8-і қорытынды алса, 17-сі қаралуда, 4-не дәлелді бас тарту берілген. Негізгі себебі – құжаттардың толық емес пакетін ұсыну, атап айтқанда жарықтандыру хаттамаларының, микроклиматтың, суды вирусологиялық зерттеудің және объектінің техникалық паспортының болмауы. Апта сайын жаңартылатын лагерьлер тізімімен комитеттің сайтында танысуға болады.
Балалар қаражаты аударылды
«Ұлттық қор – балаларға» бағдарламасы аясында жас отандастарымыз 11,49 млн АҚШ долларын нысаналы мақсатқа пайдаланды.
– Мамыр айының 1-не дейін 97 615 өтініш орындалып, жалпы сомасы 11,49 миллион АҚШ долларынан астам қаражат уәкілетті операторлар арқылы өтініш берушілердің банктік шоттарына аударылды. Жиналған қаражатты толығымен немесе ішінара пайдалануға болады. Қолданылмаған сома мақсатты жинақ шотында (МЖШ) қалады, – делінген БЖЗҚ хабарламасында.
Серіктестермен келіссөз жүргізуде
Мемлекет басшысы жариялаған «Жұмысшы мамандықтар жылы» аясында қазақстандық колледждерді интернационалдандыру жүргізілуде. Оқу-ағарту министрлігінің баспасөз қызметінің хабарлауынша, Қазақстан жұмысшы кадрларды даярлауда әлемдік деңгейге шықты.
Қазіргі уақытта салалық ведомство шетелдік серіктестермен келіссөздер жүргізуде. Олардың қатарында Қытай, Оңтүстік Корея, Франция секілді елдердің жетекші білім беру ұйымдары мен кәсіпорындары бар. Ынтымақтастық аясында академиялық ұтқырлыққа, тағылымдама мен тәжірибе алмасу бағдарламаларына, халықаралық білім беру стандарттарын, қос диплом алу бағдарламаларын енгізуге, сондай-ақ педагогтердің кәсіби құзыреттілігін арттыруға ерекше көңіл бөлінуде.
«СБ» ақпарат
