…Құдай әйелді жаратқанда оның бітім-болмысын тек алтыншы күні бітірген дейді. Қасынан өтіп бара жатқан періште одан бұл пендені неге сонша ұзақ жасағанын сұрайды. Сонда Хақ тағала әйел табиғатын барынша мықты, ерекше сезімтал әрі мейірімді етіп жаратқанын айтқан екен.
Шынында әйел заты, оның ішінде дүниеге ұрпақ әкелген ана тіршіліктің сан алуан тайталасында тастүйін бекініп, сыртқа сыр бермей, жолынан кездескен қандай қиындықты да жеңіп шығады. Осынша нәзік жаратылысымен-ақ таудай тосқауылдарға қарсы тұра алады. Сөйтіп балаларына бойындағы бар жылуын беріп, махаббатына бөлеп өсіреді.
Жүзінен шуақ төгіліп тұратын Қантгүл апамыз да – осындай болмысы бөлек, мінезі ерек, аяулы ананың бірі. Бүгінде 77 жасқа шығып отырған анамыз Жалағаш ауданына қарасты «Таң» ауылының байырғы тұрғыны.
Иә, байырғы деп отырғанымыз, ол кісі 1949 жылы, яғни соғыстан кейін осы ауылда өмірге келді. Сондықтан балалық шағы аса қызықты болмағаны белгілі. Ертерек есейді, еңбекке де араласты.
Ата-анасы қарапайым шаруа еді. Ертелі-кеш колхоздың жұмысында жүретін. Ал үйдің шаруасын шамасы келгенше балалар атқаратын. Анасының күнделікті тіршілігін көріп, қолғабыс етіп өскен Қантгүл апамыз кішкентайынан үй шаруасын үйіріп әкетті.
Ауыл мектебінен 1957-1965 жылдар аралығында білім алып, бітірген соң комсомол жастар бригадасында еңбек жолын бастады. Иә, жастар бригадасының жұмысы қым-қуыт, аудан басшылығы қайда жұмсаса, сол жерден табылатын. Ауыл шаруашылығының әр саласы, құрылыс, мәдени-ағарту бағыты болсын, бәрінде белсенді еңбек ететін.
Осындай күндердің бірінде, он сегіз жасында ауылдағы абыройлы, сыйлы кісінің бірі болған Шағыртай ақсақалдың шаңырағына келін боп түсті. Отағасы Қуанышбай ағамызбен дәм-тұзы жарасып, тату-тәтті өмір сүрді. Ол кісі ауыл шаруашылығы саласының білікті мамандарының бірі болды. Отбасында бес перзент дүниеге келді. Ізетті, инабатты Қантгүл апамыз ауыл үлкендерінің ақ батасын алып, құрметінен жаңылған емес. Өкініштісі, балаларының әкесі Қуанышбай ағамыз ертелеу өмірден өтті. Ендігі тұрмыс-тіршіліктің тізгіні өз қолында, балаларды өсіріп-жеткізу керек екенін түсінді.
Ауылда 1976 жылы жаңа клуб салынған еді. Апамыз Қантгүл Наурызбаева сол клуб жанынан ашылған кітапхана меңгерушісі болып қызмет атқарды.
Заманның ыңғайына қарай отағасымен бірге ауыл шаруашылығы саласында еңбек етіп, зейнетке шыққанға дейін көп жыл күрішші болды. Ел қатарлы еңбек ете жүріп, балаларын ештеңеден тарықтырмай өсіріп-жеткізді. Ең бастысы, оларға адал еңбек, маңдай тердің жемісін татқыза білді.
«Әке көрген оқ жонар, ана көрген тон пішер» деп атамыз қазақ айтқандай, Шағыртай әкенің ұрпақтары күні бүгінге дейін егін шаруашылығында еңбек етіп келеді. Ер баланың үлкені Имамзада жастайынан осы саланың бел ортасында жүріп, күріш өндірісін жан-жақты меңгерді. Арада бірнеше жыл өткенде «Таң ЛТД» ЖШС егін шаруашылығын құрып, бүгінде жүздеген адамды жұмыспен қамтып отыр. Одан бөлек, ауылдың әлеуметтік, тұрмыстық мәселелерін шешуде аталған шаруашылықтың көптеген жұмыс атқарғаны елдің көз алдында.
Жылдан-жылға жаңа технологиямен жарақтандырылып, Сыр маржанын әлемге таратып отырған шаруашылықтың табысы еселеп артып, еңбекшілері абырой биігінен көрініп келеді. Соның жарқын көрінісі, бірер жыл бұрын «Таң ЛТД» ЖШС төрағасы Имамзада Шағыртаев Мемлекет басшысының Жарлығымен Қазақстанның Еңбек ері атанды.
Әулеттегі келіндердің үлкені, Имамзада ағамыздың жары Разия жеңгей шаңырақққа келін болып түскелі қазыналы қариялардың тәлімін алып, қазақы тәрбиені бойына тұтқан, ас әзірлеуде қолы берекелі жан. Осындайда қазақтың: «Балаң би болсын, болмаса да, би түсетін үй болсын» дейтін батасы ойға түседі. Расында, бұл шаңырақтан талай-талай елге сыйлы жандар дәм татты. Бақ қонып, береке дарыған әулеттің балалары мен келіндері бір-бірімен тату-тәтті, сәлемі түзу, сыйластығы көпке үлгі. Ал Еңбек ерінің анасы Қантгүл апамыз бүгінде бес баладан немере-шөбере сүйіп отырған бақытты әже.
Мейірімді жүзінен шуақ тарап тұратын абыз ананы мерекесімен құттықтап, Сыр бойы халқы атынан ізгі тілегімізді осылайша білдіруді жөн көрдік.
Ғазиза ӘБІЛДА,
«Сыр бойы»
