Қармақшы ауданында 2023 жылдан бастап талантты ұл-қыздарды шығармашылыққа тәрбиелеу бағытында «Гүлзат» өнер орталығы өз жұмысын бастады. Мақсат – балалардың бос уақытын тиімді, мазмұнды ұйымдастыруда және оларды шығармашылық өнер түрлеріне баулу. Өнер орталығының ұл-қыздарды рухани құндылыққа, өнегелі өнерге, шынайы шығармашылыққа тәрбиелеуде орны ерекше. «Әр бала бір жарық жұлдыз, жарқырауына жәрдем бер!» деген мақсатпен жұмыс жасайтын өнер орталығының бір жыл ішінде шәкірттерге берген тәлім-тәрбиесі, белгілі бір өнер түріне тәрбиелеудегі жемісті еңбегі жетерлік.
Кеше үйірмеге қатысатын балаларға арналған жаңа жылдық шырша өтті. Мерекелік шара «Гүлзат» өнер орталығында бастау алды. Жаңа жылдық шыршада көтеріңкі көңіл-күймен келген балалар өз өнерлерін ортаға салып, ән шырқап, би биледі. Жаңа жылды жыл бойы асыға күткен бүлдіршіндерге жаңа жылдық сыйлықтар таратылып, жылы лебіздер айтылды.
Бүгінде өнер орталығында «Вокал», «Мәнерлеп оқу», «Домбыра», «Актерлік шеберлік», «Би» үйірмелері жұмыс істейді. Талантын шыңдауға талап қылған ұл-қыздар аталған үйірмелерде өздерінің шығармашылық қабілеттерін шыңдай отырып, түрлі байқаулар мен өнер бәйгелерінде бақ сынап, сахна мәдениетін, сөз шеберлігін дамытып, білімді де білікті тәжірибелі ұстаздардан тәлім алады. Өнерлі өрендердің бос уақытын тиімді, мазмұнды ұйымдастыру бағытында тәрбиелік-танымдық жұмыстар, ата-аналармен байланыс жұмыстары орталықта жүйелі жүргізілуде.
Жаңа жылдық шыршада балалар үшін ертегі кейіпкерлерімен дайындалған қойылымдар оларға ерекше әсер сыйлады. Балалардың жүздеріне күлкі мен шаттық ұялап, олар жасыл шыршаның жанында ән шырқады.
Айта кетейік, аталмыш үйірмені Қызылорда облысы мәдениет және құжаттама басқармасы DamuBala платформасы қаржыландырады. Жалпы үйірмеге 200-ден аса оқушы қатысады. Олардың барлығы жаңа-жылдық шыршаға қатысты. Барлығына бірдей сыйлық табыс етілді. «Вокал», «Мәнерлеп оқу», «Домбыра», «Актерлік шеберлік», «Би» үйірмесіндегі балалар өнер көрсетті. Бүгінде барлық үйірменің жұмысы тұрақты жүргізілуде. Жоғарыда атап өткен балалардың барлығы концерттік бағдарламаға қатысты.
>>> Біздің Facebook, Instagram парақшаларымыз бен Telegram каналымызға жазылыңыз! <<<
