Облыста кейінгі жылдары инфрақұрылымды дамыту бағытында ауқымды жұмыстар жүзеге асырылып келеді. Соның ішінде елді мекендерді газдандыру мен сапалы ауызсумен қамтамасыз ету – тұрғындардың өмір сапасын арттырудағы негізгі басымдықтардың бірі ретінде айқындалған. Бұл бағыттағы жүйелі жұмыстар өңірдің әлеуметтік-экономикалық дамуына серпін беріп отыр.
Расын айту керек, қазір отын мен көмірдің қамын ойлап бас қатырмай, ыс пен күлдің азабынан құтылған сан мың отбасының тұрмысы жаңа сипат алды. Әсіресе, 4 жыл ішінде елді мекендерді газдандыруға 70 млрд теңгеден астам қаржы тартылып, нәтижесінде 39 елді мекен және 1 қала (Қазалы) толық газбен қамтамасыз етілді. Осылайша, облыс бойынша газдандыру деңгейі 70-тен 83 пайызға жетті.
Жылдар бөлінісіне тоқталар болсақ, 2022 жылы 14 жобаны жүзеге асыруға 8,7 млрд теңге бөлініп, 5 елді мекен және 1 қала табиғи газға қосылды. Жыл қорытындысы бойынша газдандыру деңгейі 70 пайызды құрады. Ал 2023 жылы 26 жобаны жүзеге асыруға 8,7 млрд теңге бөлініп, жыл соңыңда 13 елді мекен табиғи газға қосылып, 36 мыңға жуық тұрғын оны тұтыну мүмкіндігіне ие болды. Сол кезеңдерде «көгілдір отынға» қосылған елді мекен 35-ке жетіп, газдандыру деңгейі 75 пайызды құрады. Алдыңғы жылы 24 жобаны жүзеге асыруға 30,5 млрд теңге бөлініп, 11 елді мекен табиғи газға қосылды. Сол жылдың соңында облыстың газбен қамту деңгейі 78 пайызға, газдандырылған елді мекен саны 46-ға өсті.
Былтыр да жақсы нәтижелер болды. 18 жобаны жүзеге асыруға 17,3 млрд теңге бөлініп, 10 елді мекен «көгілдір отынға» қосылды. Оның ішінде Шижаға, Ортақшыл, Баймұрат, Талдыарал, Ақтан батыр, Н.Ілиясов, Шаған, Дүр Оңғар ауылдарын айтуға болады. Өткен жылдың қорытындысы бойынша облысты газдандыру деңгейі 83 пайызға, газдандырылған елді мекен саны 56-ға өсті.
Биылдың өзінде 14 жобаны жүзеге асыруға 4,9 млрд теңге бөлінді. Жыл басында «Сабалақ» саяжайының тұрғындары үшін қуанышты жаңалық болды. Көптен бергі мәселе шешімін тауып, мұндағы 1600-ден астам абонент «көгілдір отынға» қосылуға мүмкіндік алды. «Сабалаққа» газ желісін жүргізу үшін 3 кезеңнен тұратын жоба дайындалған болатын. Жоба құны 3 млрд теңге болса, аймақ басшысының тікелей қолдауымен қосымша 300 миллион теңге бөлініп, саяжайдың ішкі газ желілерін тарту жұмыстары жүргізілді.
Жалпы, жыл соңына дейін облыстағы 10 елді мекенге «көгілдір отын» жеткізіп, газдандыру деңгейін 85 пайызға жеткізу жоспарлануда.
Өңірде ауызсумен қамтамасыз ету мәселесі де жүйелі түрде шешімін тауып келеді. Мемлекет басшысының елді мекендерді толықтай сапалы ауызсумен қамту жөніндегі тапсырмасына сәйкес, кейінгі жылдары ауқымды жобалар жүзеге асырылды.
2022 жылдан бастап бұл салаға жалпы 37,1 млрд теңге бөлініп, 77 жоба іске асырылды. Нәтижесінде, өткен жылдың қорытындысы бойынша облыстағы елді мекендер 100 пайыз сапалы ауызсумен қамтылды. Тағы да жылдар бөлінісіне кезек берсек, мәселен, 2022 жылы 19 жоба жүзеге асса, сол кезеңде ауыз сумен қамту деңгейі 98,1 пайызды құраған. 2023 жылы 23 жоба іске асып, 98,4%, 2024 жылы 11 жоба жүзеге асып, 98,6% болды. Былтыр 24 жоба орындалып, 100 пайыз көрсеткішке қол жеткіздік. Бұл – үлкен жетістік. Себебі, ауызсу – халық денсаулығы мен тұрмыс сапасының негізгі көрсеткіштерінің бірі.
Жасалып жатқан жобалар өңірдің инфрақұрылымдық әлеуетін айтарлықтай арттырды. Газдандыру деңгейінің жыл сайын өсуі және ауызсумен 100 пайыз қамтылуының соңында үлкен еңбек пен табандылық жатыр.
Айсәуле ҚАРАПАЕВА,
«Сыр бойы»
