Фото: Pixabay
Қостанайда қолайсыз ауа райына байланысты коммуналдық қызметтер күшейтілген жұмыс режиміне көшті, деп хабарлайды Kazinform.
Қала билігі тұрғындарға үндеу жасады.
— Ауа райының нашарлауына байланысты (жаңбыр, көктайғақ) көлік ағынының жылдамдығы төмендеп, қозғалыс аралығы артты. Түсіністікпен қарауыңызды сұраймыз, — деп түсіндірді қала әкімінің баспасөз қызметі.
Қазір қала көшелерінде құм себетін машиналар жүр. Олар жол, тротуар, аялдамаларға құм-тұз қоспасын шашып жатыр.
Сағат 21:00-ден кейін (қарбалас сағаттан соң) грейдерлер мен шөткелі тракторлар жұмысқа кіріседі.
Әкімдік сондай-ақ балалардың қашықтан оқуға көшетінін жеткізді.
— Қостанай облысында жауын-шашын мен көктайғақ салдарынан кәмелетке толмаған балалар жарақат алмас үшін 5 желтоқсанда бірінші ауысымдағы 0-11 сынып оқушылары мен колледждің барлық курс студенттері онлайн оқуға ауыстырылады, — деп түсіндірді білім бөлімінің баспасөз қызметі.
>>> Біздің Facebook, Instagram парақшаларымыз бен Telegram каналымызға жазылыңыз! <<<
