Бүгін облыс әкімінің орынбасары Бахыт Дүйсенұлының төрағалығымен көктемгі дала жұмыстарының барысы және дала, орман өрттерінің алдын алу мәселелеріне арналған кеңейтілген мәжіліс өтті.
Мәжіліске қала және аудан әкімдерінің орынбасарлары, сондай-ақ облыстық салалық басқарма басшылары, Төтенше жағдайлар департаменті, Экология департаменті, Полиция департаменті, Табиғат прокуратурасы, «Қазсушар» облыстық филиалы, «Арал-Сырдария» бассейндік инспекциясы басшылары қатысты.
Күн тәртібінде көктемгі дала жұмыстарының атқарылу барысы жан-жақты қаралып, егіс алқаптарын сапалы тұқымдармен, қажетті көлемде минералдық тыңайтқыштармен, жанар-жағармай ресурстарымен және ауыл шаруашылығы техникаларымен қамтамасыз ету мәселелері талқыланды.
Сонымен қатар, суармалы су тапшылығының алдын алу, су үнемдеу технологияларын кеңінен енгізу, ирригациялық жүйелердің тиімділігін арттыру бағытындағы жұмыстардың жай-күйі сараланды.
Мәжіліс барысында дала және орман өрттерінің алдын алу, олардың туындау себептерін болдырмау, өрт қауіпсіздігі талаптарын сақтау мәселелеріне ерекше назар аударылды. Осы бағытта жауапты мекемелердің өзара іс-қимылын күшейту қажеттігі атап өтілді.
Жиын қорытындысы бойынша облыс әкімінің орынбасары Бахыт Дүйсенұлы тиісті салалық облыстық және республикалық мекемеле басшыларына, сондай-ақ қала және аудан әкімдеріне өрт қауіпті кезеңде бекітілген мобильді топтардың рейдтік іс-шараларын тұрақты негізде және күшейтілген режимде жүргізуді тапсырды. Сонымен бірге, көктемгі дала жұмыстарының белгіленген мерзімде әрі сапалы орындалуын қамтамасыз ету, шаруашылық құрылымдарына жан-жақты қолдау көрсету және барлық тиісті шараларды үйлестіре отырып жүзеге асыру жөнінде нақты міндеттер жүктеді.
