Қалада көненің көзіндей сақталып келе жатқан санаулы ғимарат бар. Олардың әрқайсысының өзіндік тарихы мен сыры сақтаулы. Солардың бірі – қазіргі ескі базар аумағында орналасқан «Аль-Асад» сауда үйі. Көпшілік мұны сауда үйі ретінде біледі. Ал оның тарихы тереңде.
Бұл ғимаратта төрт класты қазақ жастарына арналған түземдік мектеп болған. Қазан төңкерісінен кейін, 1925-1929 жылдары баспахана қызметін атқарып, одан республикалық «Еңбекші қазақ» және «Советская степь» газеттері, өзге де басылымдар жарық көріп, еліміздің әр түкпіріне тарады. Сондай-ақ 1929-1973 жылдары облыстық кітапхана, кейінгі уақытта тігін-тоқыма фабрикасының үйі орналасты. Бұл туралы «Сыр журналистикасының тарихы» кітабының 3-томында 1925-1929 жылдары Қызылорда астана болған аралықта ең алғаш республикадағы баспахана осы ғимаратта орналасқаны, «Еңбекші қазақ» және «Советская степь» газеттері басылғаны, кейін бұл ғимаратқа аяқ киім фабрикасы көшіп келіп, мұнан соң жекеге өтіп, «Аль-Асад» дүкеніне айналғаны жазылған.
Қазіргі «Аль-Асад» дүкені – ХІХ ғасырға тән сәулет үлгісінде салынған Қызылорда қаласындағы ең ескі құрылыстардың бірі. Бұл ғимарат 1878 жылы инженер, генерал Брюноның жобасы бойынша негізі қаланып, қыздар приход училищесі болып ашылды. Кейіннен мұнда Перовск орыс-қазақ училищесі, жоғарыда атап өткендей Қызылорда астана болған жылдары ең алғаш республикадағы баспахана осы ғимаратта орналасты.
Кейінгі жылдары бұл ғимаратта аяқ киім фабрикасы орналасып, тоқсаныншы жылдары жекешелендіру уақытында жекеменшік қолға өтіп, «Аль-Асад» сауда дүкеніне айналды. Қазіргі уақытта ғимарат – мемлекет қорғауына алынған жергілікті маңызы бар тарих және мәдениет ескерткіші.
Сонымен қатар, 2017 жылы ғимарат қабырғасына «Мұстафа Шоқай 1899-1902 жылдар аралығында осы Перовск училищесі ғимаратында оқыды» деген тақта орнатылды.
«СБ» ақпарат
