Әнші Төреғали Төреәлінің басы тағы да дауға қалды. Бұл жолы оған ақын Мұнайдар Баймолда реніш білдірді. Ақын Мұнайдар Баймолданың өлеңіне жазылған «Қазақтың жылқылары» атты туындыны Төреғали Төреәлі сөзін өзгертіп «Мұғалжар жылқылары» деп жарыққа шырғарған.
«Менің «Қазақтың жылқылары» өлеңіме жазылған Алтынбек Каресов екеуміздің әнімізге Төреғали Төреәлінің көзі түсіпті! Түскені құрсын, ұрлап алып, сөзін жоқ қылып, оның орнына Қ. Алакөзовке сөз жазғызып алып, бір қожалықтың әні қылып, айтып жүр екен! Тик-токтан бір байқап қалып, ескерту жасадым. Жақсылықпен қоя ғой, менің авторлық құқыма қолыңды сұқпа деп! Жоқ, бұл бала сөз түсінбейтін болып тұр! «Ютуб арнасында, өзінің парақшасында осы ән тұр» деп маған жігіттер хабарласып жатыр. Бұл әнші жігіт Алтынбекке хабарласып, әнді сұрапты. Алтынбек өзінің келісетінін айтып, бірақ «Мұнайдар ағамнан рұқсат сұраңыз» депті. Ал Төреғали мені адам екен демеген, ағам екен демеген, өзім білемге салыпты. Ал осынысы дұрыс па? Менен сұраған да жоқ. Мен рұқсат бермейтін де едім. Сөзін өзгертпей айтса, онда ойланатын едім. Ол менің сөзімді жоқ қылған ғой. Ән өлеңіме бола туды, соған арнайы жазылды! Бірінші өлең туды, соған менің тапсырысыммен ән жазылды. Сонда бұл әннің авторы кім?» – деп ашуланды Мұнайдар Баймолда.
Ақын «Қазақтың жылқылары» атты өлеңінің 2019 жылы жарық көрген «Бөріде не арман бар» атты кітабына енгенін айтты. Сондай-ақ алдағы уақытта Төреғали Төреәліні сотқа беруден тайынбайтынын жеткізді.
«Менің әнімді рұқсатымсыз алғаны аздай, онымен өзіне жалған абырой жинап жүр. Мұғалжар жылқысы жайлы әндетіп, біреулерден ақша алып, мейманасы тасып тұрған болар. Осылай менің Қазақтың жылқыларына, яки ұлтымыздың, халқымыздың асыл жануарына арнаған әнімді тапап өтпекші, жоқ қылмақшы! Сіздермен ақылдасайын деп шештім. Төреғалиды сотқа берейін бе, жоқ па? Оныкі адамдыққа жата ма? Біраздан бері айтылып, тіпті бейнебаян да түсірілген әнді бұлай иемденіп алуына жол беріп қойып отыра берейін бе? Өзім соттасуды жаратпаймын. Әніме шабуыл жасап отыр. Ашық күнде. Еш ұялмай, қысылмай. Бұл Төреғали атақты болсам, әумесер болсам, маған бәрі жарасады деп ойлай ма екен?
Төреғали біздің «Қазақтың жылқылары» әнінен «Мұғалжар жылқылары» деген, бір аумақтың, шаруа қожалықтың әнін шығарып алған. Сізге жалпы Қазағымның жылқылары қымбат па, әлде бір ғана Мұғалжар тұқымы ма? Адамның сотына бермей, Алланың сотына тапсырайын ба? Екіншісі өте ауыр. Ол қияметке кетеді. Менен кешірім сұрап, доғара қойса, мен кешірер едім. Олай істейтін арлы азаматты, ұятты адамды әзірге көрмедім. Мен әлі аяп отырмын. Түсінер, кешірім сұрар деп. «Ұлы даланың баласымын» деп кеудесін көтеруші еді, қайда сонысы? Ұлы даланың жылқыларына арнаған әнді жоқ қылып, оның орнына бір ғана тұқымды мақтаған, ақша үшін жазылған дүниесін күйттегені ұлтты қорлағандай болды!» – деді Мұнайдар Баймолда.
>>> Біздің Facebook, Instagram парақшаларымыз бен Telegram каналымызға жазылыңыз! <<<
