Сыр елі – тарихы терең, тынысы кең, әр перзентінің жүрегінде туған жеріне адал қызмет етуге өнеге қалдыратын өңір. Мұнда туған әр азамат үшін өз туған жерін дамыту – тек міндет емес, бұл сезіммен атқарылатын парыз. Сол парыз жолында еңбек еткен Сырдың төл перзенті Нұрлыбек Машбекұлы Нәлібаевтың басқарушылық тәжірибесі – туған жерге адалдықтың, халыққа қызмет етудің айқын көрінісі.
Қазір қонақ та, осында келген әріптес те Сыр өңірінің тынысы кеңіп, келбеті жаңарғанын көріп таңдай қағады. Аз уақыт ішінде өңірдің әлеуметтік-экономикалық өмірі өзгерді. Әр саладағы жаңа бастамалар – тек қағаз жүзінде емес, халықтың өмір сүру сапасын жақсартуға бағытталған нақты іс. «Ел іші – алтын кеніш» дегендей, халықтың сенімі мен ықыласы – әкім үшін ең басты өлшем болды.
Бүгінгі Қызылорда облысы келбетіне көз жүгіртсек, өңірімізде кездейсоқ жетістік жоқ екенін анық аңғарамыз. Әрбір оң өзгерістің артында жүйелі жоспар, табанды еңбек және жауапкершілікке негізделген басқару мәдениеті жатыр.
Сыр елі туралы айтылған жылы пікірлерді жиі естиміз. Мұның барлығы – уақытпен дәлелденген, жүйелі жүргізілген жұмыстың жемісі. Аз ғана мерзім ішінде аймақтың даму қарқыны үдеп, көптеген салада тың серпін қалыптасты.
Ең алдымен, өңір экономикасының тірегі саналатын бюджет көлеміне назар аударсақ, соңғы төрт жылда 2,5 есе өсті. Бұл өңірдің қаржылық әлеуеті нығайып, әлеуметтік және инфрақұрылымдық жобаларды кең көлемде жүзеге асыруға мүмкіндік алғанының айғағы.
Инвестиция тарту бағытында да нақты нәтижелер бар. Соңғы үш жыл ішінде өңірге 2 триллион теңгеге жуық инвестиция тартылып, ірі өндірістік және инфрақұрылымдық жобалар іске асырылуда. Нәтижесінде жаңа жұмыс орындары құрылып, экономиканың әр саласында қозғалыс пайда болды. Ал аймағымызға шетелдік және басқа көздер арқылы алдағы жылдары 3 трлн теңгеден астам қаражат тарту жоспарланып отыр. Қаржылық мүмкіндіктер әлеуметтік және инфрақұрылымдық жобаларды кең көлемде жүзеге асыруға жол ашады.
Әлеуметтік саладағы оң өзгерістер де ерекше назар аудартады. Екі жүзден астам білім, денсаулық сақтау, мәдениет және спорт нысандары бой көтерді. Жаңа мектептер мен заманауи медициналық мекемелер тұрғындардың тұрмыс сапасын арттырып, болашақ ұрпаққа жасалған маңызды инвестиция екенін көрсетеді. 500 орындық емхана мен 200 орындық перзентхана – халық денсаулығына, әсіресе ана мен баланың өміріне жасалған стратегиялық қадам. Жаңа инфрақұрылымдық жобалар – жылу-электр орталығы, сапалы ауызсу және газбен қамту – тұрғындардың күнделікті өмірін жақсартуға бағытталған нақты әрекеттер.
Қала мен ауылдың сәулеттік келбеті жаңарды. Жолдар жөнделіп, жаңа ғимараттар бой көтерді. «Жолың болса – жерің кең» дегендей, транспорттық инфрақұрылымды жаңарту, «Батыс Еуропа – Батыс Қытай» дәлізін кеңейту, әуежай мен теміржол вокзалын жаңарту өңірдің экономикалық әлеуетін арттырды.
Тағы ең маңызды инфрақұрылымдық жобалардың бірегейі – «Қызылорда-Ақтөбе» халықаралық автожолын жаңғыртуға 1 трлн теңге, сонымен қатар «Бейнеу-Сексеуіл» бағытындағы жаңа жолға 500 млрд теңге бөлінеді. ББШ газ құбырының 2 желісі 1 трлн теңге, Бу-газ электрстанциясы (Катар инвестициясы арқылы) 800 млрд теңгеден асады. Мұның артында көзге көрінбейтін қаншама еңбек, көптеген келіссөз жатыр.
Нұрлыбек Машбекұлының басқару жүйесі – тиімділік пен жауапкершілікке негізделген. 24 басқарма 16-ға қысқартылып, бағыттас құрылымдар біріктірілді. Мұндай шешім қабылдау жылдамдығын арттырып, нәтижеге қол жеткізудің кепілі болды. «Біздің кеңесшіміз – халық» деген ұстаным ашық диалогті қамтамасыз етіп, әлеуметтік шиеленістерді болдырмай, халық пен билік арасындағы сенімді нығайтты.
Қызылорда қазір нағыз үлкен құрылыс алаңына айналып, әр іргесі жаңалық пен дамуға толы. Тұрғын үй құрылысы қарқынды жүріп, сапалы баспана мәселесі шешілуде. Құрылыс сапасына қойылған қатаң талаптар тұрғындардың сенімін нығайтып, әр жобада жүйелілік пен талапшылдық бар екенін көрсетті. Айта берсек, тың бастама, оң өзгеріс көп.
Мемлекет басшысының қолдауы да – аймақ басшысының еңбегінің айқын көрінісі. Қасым-Жомарт Кемелұлы Тоқаев өңірдің даму қарқынын бірнеше мәрте жоғары бағалап, Сыр өңірінің жүйелі дамып келе жатқанын атап өтті.
Қорытындылай келе, төрт жыл – тек уақыт өлшемі емес, нақты нәтиже мен сенімді нығайтқан кезең. Нұрлыбек Машбекұлының табанды еңбегі Сыр өңірін жаңа деңгейге көтеріп, әр саладағы жетістіктер арқылы халық өмірінің сапасын арттырды. Оның басқару стилі – ашық, талапшыл, жүйелі. Бұл – тек әкімнің еңбегі емес, туған жерге адал қызметтің жарқын үлгісі.
Бүгінде Сырдың әр қиырында өркендеген өмір көрінеді. Бастысы, елдің жүрегі тыныш, тұрғындары қуанышты болсын. Әр отбасы бақытқа кенелсін, әр бала білімге ұмтылсын, әр ауыл мен қала гүлденсін. Туған жердің әр күні – жаңа мүмкіндік, серпін мен мерейге толы болсын!
Мархабат ЖАЙЫМБЕТОВ,
ҚР Парламенті Мәжілісінің депутаты
