Ә.Тәжібаев атындағы облыстық әмбебап ғылыми кітапханасында «Қазақстанның киелі жерлерінің географиясы» жобасын жүзеге асыру жөніндегі облыстық жұмысшы топтың отырысы өтті.Оған «Қасиетті Қазақстан» ғылыми-зерттеу орталығының басшысы Берік Әбдіғалиұлы қатысып, жоба аясында алдағы уақытта атқарылатын жұмыстар барысын баяндады.
Жиында Қызылорда облысы бойынша музейлер, архивтер және тарихи-мәдени ескерткіштерді қорғау мекемесімен бірге ынтымақтастықта жұмыс жасап, Сыр өңірі бойынша анықталған жалпыұлттық және өңірлік қасиетті нысандарды ғылыми тұрғыда терең зерттеуді жалғастыру мәселесі кеңінен талқыланды.
«Қазақстанның киелі жерлерінің географиясы» жобасын жүзеге асыру жөніндегі Қызылорда облыстық жұмысшы топ мүшелері аталған тақырып аясында өз ойларын ортаға салып, Сыр өңірі бойынша анықталған қасиетті нысандарға қосымша енгізуді ұсынды.
Ақын Ш.Әбдікәрімов, Қорқыт ата атындағы ҚМУ профессоры Б.Кәрібозов, облыстық «Рухани жаңғыру» орталығының бөлім басшысы С.Қосанов, облыстық музейдің ғылыми хатшысы А.Сайлау және тарихи-мәдени ескерткіштерді қорғау мекемесінің директоры С.Көзейбаев қасиетті нысандарды анықтау барысында кездескен қиындықтармен және жұмысшы тобының жеткен жетістігімен бөлісті.
Өңіріміздегі тарихи-мәдени ескерткіштердің тарихи маңызы айрықша айтылып, зерттеуді қажет етіп тізімге енбей қалған нысандарды кітапқа кіргізу үшін атқарылатын жұмыстарды зерделеді.
Отырыс барысында облыстық музейдің «Қазақстанның киелі жерлерінің географиясы» жобасы бойынша ұйымдастырған «Сыр өңірінің қасиетті орындары» атты телеэкспедициясының І және ІІ кезеңі бойынша баяндама жасалды.
>>> Біздің Facebook, Instagram парақшаларымыз бен Telegram каналымызға жазылыңыз! <<<
