Биылғы жылдың ең басты жаңалығы – Алаштың анасы атанған Сыр өңірінде Ұлттық құрылтайдың бесінші отырысының өтуі. Құрылтай отырысында мемлекет, қоғам алдында тұрған маңызды мәселелер сараланып, саяси салмағы бар шешімдер қабылданды. Мемлекет басшысы Қызылорда облысында кейінгі үш жыл көлемінде атқарылған жұмыстарға жоғары баға берді.
«Қазір Қызылорда облысында, әсіресе, әлеуметтік салада жақсы жаңалық көп. Үш жылда осы аймақта 34 білім беру, 45 мәдениет және спорт нысаны салынды. Бұған қоса, 40 медицина нысаны ашылды. Менің тапсырмаммен Қызылордада 300 орынға арналған көпбейінді аурухананың құрылысы басталды. Көп ұзамай 500 орындық емхана және 200 орындық перзентхана салынады.
Бір сөзбен айтқанда, Қызылорда облысы барлық салада қарқынды дамуда. Облыстың жағдайы жалпы жақсы деп күмәнсіз айтуға болады. Бұл – әкім Нұрлыбек Нәлібаевтың белсенді, табанды жұмысының нәтижесі» деді Президент.
Тағы бір жаңалық, осыған дейін Астана, Алматы қалаларында президенттік кітапхана құрылысы басталған болса, енді осындай заманауи кітапхана біздің облыста салынбақ.
Мемлекет басшысы Құрылтайда сөйлеген сөзінде еліміз ауқымды саяси жаңғырудың жаңа кезеңіне қадам басқалы тұрғанын, алдағы парламенттік реформа көптеген өзгерістің өзегі болатынын атап айтты. Осы орайда құрылтайда ел ертеңі үшін қабылданған реформаларды құптаймыз және қолдаймыз!
Райкүл БАЙНАЗАРОВА,
облыстық әйелдер
кеңесі қоғамдық
бірлестігінің төрайымы
