Елдің болашағына қатысты маңызды шешімдерде әр азаматтың дауысы естілуі тиіс деп есептеймін. Дауыс беру арқылы мен тек өз пікірімді білдіріп қана қоймай, еліміздің дамуына бейжай қарамайтынымды көрсеттім. Әрбір кәсіпкер қоғамдағы өзгерістерге белсенді қатысып, елдің экономикалық әрі әлеуметтік дамуына үлес қосуы керек деп ойлаймын. Сондықтан мұндай маңызды сәттерде шет қалмай, азаматтық позиция таныту – баршамыздың ортақ міндетіміз.
Сол күні таңертең жолдасым екеуміз №352 референдум учаскесіне барып, таңдауымызды жасадық. Біз көбіне өзгерісті күтеміз, жақсы өмірді қалаймыз, бірақ сол өзгерістерге үлесімізді қосу әрдайым өз қолымызда екенін ұмытып жатамыз. Еліміздің тұрақты дамуы, әділ қоғам қалыптастыру, заң үстемдігі мен халықтың әл-ауқатын арттыру – баршамызға ортақ мақсат. Осындай мақсаттарға жету жолында әрбір азаматтың пікірі маңызды рөл атқарады. Сондықтан маңызды науқандарда белсенділік таныту біздің азаматтық санамыздың көрсеткіші деп ойлаймын.
Меніңше, бүгінгі таңда әр адам «менің дауысым ештеңені өзгертпейді» деген ойдан арылу керек. Керісінше, әрбір дауыс – өзгерістің бір бөлшегі. Бірігіп қабылданған шешімдер ғана елдің болашағын айқындайды. Сол себепті мен өз таңдауымды саналы түрде жасап, болашақ ұрпақ алдында жауапкершілікті сезіндім.
Барша қазақстандықтарды осындай маңызды сәттерде белсенді болуға, өз таңдауын жасауға шақырамын. Себебі біздің бүгінгі қадамымыз – ертеңгі елдің келбеті.
Дина МАХАТОВА,
«АС-КА» тігін фабрикасының директоры
