Футболдан қыздар арасында ел чемпионатына алғаш рет қатысып жатқан «Қайсар» футбол клубы жаңа маусымды жеңіспен бастады.
Талдықорғанда жергілікті «Жетісу» клубымен кездескен олар қарсыласынан 3:2 есебімен басым түсті. Ойын барысында Құндыз Қожахмет стандарттан қос голдың авторы атанса, алаң иелерінен бір футболшы өз қақпасына гол соғып алды.
Жергілікті маман Берік Сансызбаев командада бас бапкер қызметін атқарады. Оған Сәкен Наукенов көмекшілік жасайды.
Биыл ел чемпионатында ойын көрсететін ерлер клубтарының әйелдер құрамалары да толықтай қатысады. Өткен жылы чемпионатқа тек 4 өңірден 5 команда ғана тіркелген еді.
Қазақстан Премьер-лигасы сайтында көрсетілгеніндей, биыл турнирде «Атырау», «Жетісу» (Талдықорған), «Астана», «Елімай» (Семей), «Қайсар» (Қызылорда), «Қызылжар» (Петропавл), «Ақтөбе», «Ұлытау» (Жезқазған), «Қайрат» (Алматы), «Томирис-Тұран» (Түркістан), «Оқжетпес» (Көкшетау), «БИІК» (Шымкент), «Тобыл» (Қостанай) және «Жеңіс» (Астана) сынды 14 команда сынға түседі.
Сондай-ақ биыл әр команда сапында кемінде қазақстандық футбол мектебінің 13 түлегі болуға тиіс деген талап қойылып отыр. Оған 2009 жылы және одан ерте дүниеге келген футболшылар қатыса алады.
«СБ» ақпарат
>>> Біздің Facebook, Instagram парақшаларымыз бен Telegram каналымызға жазылыңыз! <<<
